"Çempionata başlayanda qarşımıza mükafatçılar sırasında yer almaq tapşırığı qoyulmamışdı" - AÇIQLAMALAR
Birinci divizionda mövsümün başa çatmasına bir tur qalsa da, 2-ci və 3-cü yerlərin sahibləri müəyyənləşməyib.
Gümüş və bürünc medallara 4 komanda - "Şamaxı-2", "Qarabağ-2", "Neftçi-2" və "Sabah-2" iddialıdı. Bu gün baş tutacaq qarşılaşmalar ərəfəsində komandaların baş məşqçilərinin fikirlərini öyrəndik.
Mahmud Qurbanov (Neftçi-2): "Divizionda çempion məlumdu. Gümüş və bürünc mükafatlar uğrunda əsasən üç komanda mübarizə aparır. Qalib ruhumuz olsa da, şanslarımız yüksək deyil və rəqiblərimizin nəticələrinə çox bağlıdı. Çempionat ərzində çox xal itirdik, 23 və 25-ci turlarda "Səbail-2" və MOİK-ə qarşı azlıqda oynasaq da, çoxsaylı qol imkanlarımız oldu. Amma təəssüf ki, hər iki oyunda heç-heçə edib vacib xallar itirdik. Yenə də nikbinik, son matçda qələbə qazanıb rəqiblərimizin nəticələrinə baxacağıq".
Cavad Mirzəyev (Qarabağ-2): "Çempionata başlayanda qarşımıza mükafatçılar sırasında yer almaq tapşırığı qoyulmamışdı. Əsas məqsədimiz gənc futbolçularımızın maksimum oynayaraq öz potensiallarını üzə çıxarması və onları əsas komandaya qazandırmaq idi. Sevindirici haldı ki, klubumuzun yetirmələrindən Rauf Hüseynli əsas komandada qol hesabını açdı, Amin Ramazanov, Zamiq Əliyev, Nihad Quliyev debüt etdi. 3-cü yerə qədər gəlib çıxmışıqsa, minimum mövqeyimizi qorumalıyıq. Şans varsa, niyə də 2-ci pilləni tutmayaq?! Son turda da adımıza yaraşan oyunu sərgiləyəcəyik".
Rail Məlikov (Şamaxı-2): "Şamaxı-2" yə 22-ci turdan sonra rəhbərlik etməyə başladım. Buna rəğmən, komandada özünəinam yarada bildik. Son iki oyunda komanda maksimum performans sərgiləyir. Futbolçularıma güvənir və inanıram ki, son turda da meydanı qalib tərk etməklə 2-ci pilləni əldə saxlayacağıq".
İlqar Mənsimov (Sabah-2):
"Son turda səfərdə "Kəpəz" kimi güclü komandaya qarşı oynayacağıq. Mükafatçılar sırasına düşmək şansımız azdı. Qapımızın toxunulmazlığını saxlamaq şərtiylə 8-9 qolla qalib gəlməli və rəqiblərimizin büdrəməsini gözləməliyik. Amma ruhdan düşmürük, Gəncəyə əl-qolumuzu yanımıza salmaq üçün gəlməmişik".
ABDULLA İSMAYILOĞLU
