Bu, yarım milyon deməkdi
Avropa Liqası
2-ci təsnifat mərhələsi, ilk oyun
İNTER – Fola (Lüksemburq)
Hakimlər: EYTAN ŞMUELEVİTS, Nissan Davidu, Saqi Mazamber, Daniel Bar Natan (hamısı İsrail).
Hakim-inspektor: Oğuz Sarvan (Türkiyə).
UEFA nümayəndəsi: Vladislav Xodeyev (Rusiya).
12 iyul. Bakı. “Dalğa Arena”. Saat 20.00
Sabah Avropa Liqasında 2-ci mərhələyə start veriləcək ki, ilk oyun günü meydana çıxacaq komandalardan biri də “İnter”di. Əslində paytaxt təmsilçisi də ayın 13-də oynamalıydı. Ancaq Avroliqadakı hər üç təmsilçimizin ilk matçını Bakıda keçirəcəyini nəzərə alan UEFA dəyişiklik etdi ki, “Zirə” Rumıniyaya “göndərildi”, “Qəbələ”ylə eyni gündə oynamasın deyə, “İnter”in “Fola” ilə görüşü bir gün əvvələ çəkildi.
Borca görə “İnter Arena”dan çıxaraq Mərdəkana sığınan Zaur Svanadzenin komandası bir həftə ərzində “Dalğa Arena”da ikinci oyuna çıxacaq. “Mladost”u səfərdə 3, evdə 2 cavabsız qolla mübarizədən kənarlaşdıran bakılılar qələbə seriyasını lüksemburqlularla görüşdə də davam etdirməlidi. Bu, müflis olan və maliyyə sıxıntısı yaşayan klubun durumunu yaxşılaşdıra bilər. İki mərhələnin iştirakçısı olan “İnter” artıq 440 min avro, yəni bir milyon manata yaxın qazanc əldə edib. Bu mərhələ də keçilsə, məbləğ milyonyarıma yüksələcək ki, bu da premyer-liqada ortabab komandaların birillik büdcəsinə bərabərdi. Üçüncü mərhələnin bünövrəsi isə məhz bu gün qoyulmalıdı. “Zirə”nin Lüksemburqun digər təmsilçisi “Differdanj”ı rahat adladığını nəzərə alsaq, “İnter” də buna borcludu. Hər halda, zirəlilərin rəqibi daha güclü idi. “Differdanj” ötən mövsümü 2-ci (çempionla eyni xal toplayaraq) sırada bitiribsə, “Fola”nın 9 xal geri qalaraq, bürünc medulla kifayətləndiyini qeyd etməliyik.
“İnter” – “Fola” matçını israilli hakimlər briqadası idarə edəcək. “Dalğa Arena”dakı görüşdə Eytan Şmuelevits ədalət təmsilçisi rolunu oynayacaq. Ona Nissan Davidu və Saqi Mazamber kömək edəcək. Oyunun ehtiyat hakimi funksiyasını Daniel Bar Natan yerinə yetirəcək. Şmuelevits təmsilçilərimizə kifayət qədər tanışdı. O, 5-ci dəfə bizimkilərin oyununa təyinat alıb. Sadəcə, Şmuelevits indiyə qədər yalnız milli səviyyəsində matçlarda olub. Referi öncə 2012-ci ildə 17 yaşadək futbolçulardan ibarət yığmamızın AÇ-2013-ün seçmə mərhələ görüşlərində fit çalıb. O, U-17-nin həmin il oktyabrın 21-də Polşa, 24-də isə Bolqarıstanla matçını idarə edib. Komandamız hər iki oyunda uyğun olaraq 0:1 və 1:4 hesabı ilə uduzub. İsrailli 2015-ci il noyabrın 17-də U-21 üçün Bakıya səfər edib. AÇ-2017-nin seçmə mərhələsində baş tutan Azərbaycan – Rusiya görüşündə ədalət təmsilçisi olan hakim yığmanın 3 cavabsız qoluna şahidlik edib. Həmin qarşılaşmada o, komandamızın xeyrinə penalti də təyin edib. Təcrübəli hakimin ölkəmizə son səfəri ötən ilin oktyabrına təsadüf edib. Ancaq bu dəfə baş hakim kimi yox. Belə ki, DÇ-2018-in seçmə mərhələsində keçirilən Azərbaycan – Norveç (1:0) oyununda o, 4-cü hakim funksiyasını yerinə yetirib. Ümumiyyətlə, 2012-dən FİFA referisi olan Eytan Şmuelevits 30 beynəlxalq görüşdə fit çalıb. Bu il ilk təyinatını alan israilli hakimin ən böyük uğuru 2 dəfə Avropa Liqasının (2013/14, 2014/15) qrupunda idarəçilik etməsidi. O, Avropa arenasındakı qarşılaşmalarda ümumilikdə 6 dəfə penalti təyin edibsə, 124 sarı, 5 qırmızı vərəqə göstərib.
Qeyd edək ki, sabah saat 20.00-da başlayacaq “İnter” – “Fola” matçını “CBC Sport” telekanalı canlı yayınla tamaşaçılara təqdim edəcək.
MİRAĞA
