“İmarət” Tiflisə getmək üçün avtobus sifariş edib
Ölkə çempionu “Qarabağ” bu gün cari avrokubok mövsümündə ilk oyuna çıxır. Çempionlar Liqasının qrup mərhələsini hədəfləyən Qurban Qurbanovun komandasının bu yolda ilk rəqibi Gürcüstan təmsilçisi “Samtredia”dı.
Ötən həftədən satışa çıxarılan biletlərə tələbatdan belə qənaətə gəlmək olar ki, həmişəki kimi “köhlən atlar”ın oyununda tribunalarda anşlaq olacaq. Azarkeşlər bu dəfə də “Avropa fatehi”ni dəstəksiz qoymayacaq. Heç kimə sirr deyil ki, tribunalara gələn tərəfdar da iki qrupa bölünür. Bir var sadə azarkeş, bir də var fanatlar. Birinci qrupa aid olan şəxslər əsasən 90 dəqiqəni sakit tərzdə izləyir, yalnız dəstək verdiyi komanda fərqlənəndə emosiyalarını büruzə verir, qol sevincini səs-küylə qeyd edirlər. Fanatlar isə bütün matçboyu dayanmadan sevimlilərini irəli səsləyir, şəninə təzahüratlar səsləndirir, müxtəlif pankartlar qaldırmaqla futbolçuları qələbəyə ruhlandırırlar. Məhz fanklub üzvləri isti-soyuq bilmədən, yağışda, qarda könül verdikləri komandanın yanında olurlar. Azərbaycan klubları arasında ən çox fanatı olanlardan biri, bəlkə də birincisi elə “Qarabağ”dı. “İmarət”, “Qarabağ ordusu”, “Qarabağ boys”, “Qarabağ ledis” kimi fanklublar istər çempionat, istərsə də beynəlxaq matçlarda “köhlən atlar”ı yalqız buraxmırlar.
Bəs görəsən, “Samtredia” ilə oyunda ağdamlı fanatlar nə ilə yadda qalacaqlar? Gürcüstan çempionu ilə oyunda tribunalarda hansı maraqlı mənzərəyə şahidlik edəcəyik? Bu suallara aydınlıq gətirmək üçün fanklublarla əlaqə saxladıq. Öncə “İmarət”in rəhbəri Elnur Quliyevlə danışdıq: “İmarət”çilər həmişəki kimi bu oyunda da 2-ci sektorda yerini tutacaq. Təxminən 600-ə yaxın fanklub üzvü “Qarabağ”a dəstək verəcək. Əslində biz Bakıdakı matça çox diqqət ayırmaq istəmirdik. Bütün fikrimizi bir həftə sonra Gürcüstanda keçiriləcək cavab görüşünə yönəltmişdik. Bildiyiniz kimi, qonşu ölkədə xeyli erməni yaşayır və buna görə də komandanı orda tək qoymaq istəmirik. Onu da qeyd edim ki, artıq Tiflisə yollanmaq istəyən 50 azarkeş bizə müraciət edib, avtobusu da danışmışıq. Ola bilsin, gələn həftəyə qədər sıralarımız bir qədər də genişləndi. Bu məsələdə klub rəhbərliyi bizə kömək etməyə hazır olduğunu bildirib. Lakin fanklubun İdarə Heyəti bütün xərcləri öz üzərinə götürüb. Ancaq son günlər cəbhədə yaşananlar, körpə Zəhranın ölümü bizi vadar etdi ki, sabah (bu gün) baş tutacaq qarşılaşmaya da önəm verək. İndidən bütün kartları açmaq istəmirəm. Lakin fikrimiz var ki, hansısa formada erməni faşizmini dünya ictimaiyyətinə çatdıraq. Bu yöndə müəyyən fikirlər var və çalışacağıq düşündüklərimizi həyata keçirək”.
“Qarabağ ordusu”nun rəhbəri Elvin Süleymanov da fanklub üzvlərinin “Tofiq Bəhramov”da olacağını bildirdi: “Qarabağ ordusu” 650 nəfərlə komandaya dəstək olacaq. Artıq biletlərimiz də hazırdı. Komanda avrokuboklarda bu yay ilk oyuna çıxdığından ona güclü dəstək lazımdı. Fanklub üzvləri matça ciddi hazırlaşır. Müxtəlif pankartlar hazırlamışıq, yeni-yeni şüarlar düşünmüşük. Allah qoysa, stadionda hamısını görüb-eşidəcəksiz. Fikirmiz var idi ki, Füzuli rayonunun Alxanlı kəndində düşmən gülləsinə tuş gələn iki yaşlı Zəhra üçün də pankart hazırlayaq. Ancaq fikirləşdik ki, onsuz da həmin pankartı açmağa imkan verməyəcəklər. UEFA bu cür məsələlərə xüsusi önəm verir. Bu üzdən Zəhra balanın xatirəsinə şüarlar səsləndirməyi planlaşdırmışıq”.
“Qarabağ boys” fanklubu isə 500 nəfərlə “köhlən atlar”a dəstək verəcək. Bu haqda bilgini fanklubun rəhbəri Ramiz Bayramovdan aldıq: “Biz 2-ci sektorda yer alacağıq. Düzdü, hələ biletləri götürməmişəm. Sabah (bu gün) biletləri əldə edib paylayacağıq. Müxtəlif plakatlar hazırlamışıq. Əsas gücümüzü ötən həftə cəbhə bölgəsində dünyasını dəyişən iki yaşlı Zəhraya aid olan pankartlara yönəltmişik. Başqa şüarlarımız da olacaq. Bir sözlə, bacardığımızı ən yaxşı formada nümayiş etdirməyə çalışacağıq. Gələn həftə Tiflisdə keçiriləcək cavab görüşünə də yollanmağı planlaşdırırq. İndidən səfərə neçə nəfərin çıxacağını deyə bilmərəm. Hər şey qarşıdakı günlərdə məlum olacaq. Klub tərəfindən azarkeşlərə Gürcüstan paytaxtına getmək üçün nəqliyyat vasitəsi ayrılmasa belə, səfərə öz hesabımıza getmək fikrimiz var”.
RƏŞAD
