Xətai Bağırov: “İnanıram ki, “Araz” sensasiyaya imkan vermədən elit mərhələyə, ordan da “dördlər finalı”na adlayacaq”
Futzal üzrə UEFA kubokunun əsas mərhələsindəki rəqiblərini ötən həftə tanıyan “Araz” qitə turnirinin hazırlığına gələn həftədən başlayacaq. Joze Alesio da Silva bu həftəsonu, konkret iyulun 16-da Bakıya gələcək. 2014-cü ildə ölkəmizdən ayrılaraq Qazaxıstana üz tutan, ancaq Futzal Federasiyasının israrıyla geri qayıtmağa razılıq verən braziliyalı mütəxəssisin ilk sınağı məhz ÇL statuslu turnirdə olacaq.
Əslində “Araz” hələlik əsas mərhələdəki rəqiblərindən birini tanıyır. Bu, Rumıniya “Deva”sıdı. B yolunda və 8-ci qrupda mübarizə aparacaq Naxçıvan təmsilçisinin digər iki rəqibi birinci təsnifat mərhələsindən sonra bəlli olacaq. E və F qruplarının qalibləri təmsilçimizin rəqibi olacaq. Qeyd edək ki, E qrupunda “Flamurtari” (Albaniya), “Mostar” (Bosniya və Hersoqovina), “Arnavutköy Bələdiyyəspor” (Türkiyə) və “Narva Yunayted” (Estoniya), F qrupunda isə “Anortosis” (Cənubi Kipr), “Klassik” (Moldova), “Leo” (Ermənistan), “Reksem” (Uels) komandaları qüvvəsini sınayacaq. Ermənistan klubu F qrupunu qalib kimi başa vursa, o zaman B yolunda 5-ci qrupda mübarizə aparacaq, həmin qrupa yüksələcək komandalardan biri də "Araz"a rəqib olacaq. Təsnifat mərhələsinin oyunları avqustun 22-27-si aralığında, əsas raundun görüşləri isə oktyabrın 10-15-də keçiriləcək. “Araz”ın yer aldığı qrupun oyunları Rumıniyada keçiriləcək. Bu, “Deva” üçün üstünlükdü. Rumıniya təmsilçisi UEFA reytinqində 22-ci yerdədi və reytinqi 4,834-ə bərabərdi. Halbuki təmsilçimiz 56 komandanın yer aldığı sıralamada 14-cüdü. “Araz”ın reytinq xalı isə 13.001-di. Bu da əsas rəqibinin meydanında oynamasına baxmayaraq, naxçıvanlıların şəxsiz favorit statusuna xələl gətirmir.
“Araz”ın üzvləri də bu fikirdədi. Xətai Bağırov elit mərhələyə yüksələcəklərinə əmindi: “Püşkün nəticəsindən xəbərim var. Bilirəm ki, rəqibin biri Rumınya klubudu. Bu ölkənin futzalı inkişaf edib. Yəni onlara zəif rəqib gözüylə baxa bilmərik. Buna baxmayaraq, biz ötənilki kimi qrupu 1-ci yerdə başa vuracağıq. Rəqibin kim olmasından asılı olmayaraq, biz öz işimizi necə lazımdı görəcəyik. Reqlamentdəki dəyişikliklər haqda isə geniş məlumatım yoxdu. Yeni qaydalar, “A yolu, B yolu” söhbəti var. Bəzi qruplardan 3, bizimkindən 1 komanda çıxacaq elit mərhələyə. Halbuki keçən il 2 komanda çıxırdı. Biri birbaşa, digəri pley-off oynadıqdan sonra. İnanıram ki, “Araz” sensasiyaya imkan vermədən elit mərhələyə, ordan da “dördlər finalı”na adlayacaq”.
“Araz”ın daha bir gənc üzvü İsa Atayev isə Alesionun təcrübəsinə arxayındı: “Püşk haqda indidən fikir bildirmək tezdi. Çünki cəmi 1 komandanın adı bəllidi. Qalan ikisi təsnifat mərhələsindən gələcək. Amma doğrudu, birinci mərhələdən gələnlər zəif olur. Əsas rəqib, çox güman, elə Rumıniya təmsilçisi olacaq. Əslində son illər Avropa arenasında bu ölkənin digər təmsilçisi “Tırqu Mureş” olub və bu komanda daha çox tanınır. Fərq etməz, onları və və o biriləri yenib qrupu qalib kimi başa vurmalıyıq. Alesionun “Araz”a və yığmamıza dönüşü işimizə yarayacaq. Çünki o, ÇL-də qələbə qazanmağın yolunu mükəmməl bilir. Miltinyo və Biro Jadenin Avropanın klub turnirində təcrübəsi yox idi. Alesio isə final görmüş, “Araz”la bürünc mükafat qazanmış mütəxəssisdi. Hazırlığa tam heyətlə hardasa ayın 20-dən başlayacağıq. Alesio 16-da gələcək, o biri braziliyalılar isə 17-si və 18-də dönməlidi. Çox güman, ilk mərhələdə fiziki hazırlığımızı qaydaya salacağıq. Istənilən halda, qarşıda 3 ay vaxtımız var və yaxşı hazırlaşa bilərik”.
MİRAĞA
