Amerikanın “The Athletic” nəşrinin açıqladığı hesabatdan MBA-nın televiziyadakı və sosial şəbəkələrdəki auditoriyasında ciddi artımın olduğu görünür.

2021/22 mövsümü ərzində MBA-nın ortalama auditoriyası ABC, ESPN və TNT kanallarında ötən illə müqayisədə 19 faiz artıb. Bu həm də 2019/20 mövsümü ilə müqayisədə 3 faiz artım deməkdi. Qadın tamaşaçıların sayı isə 23 faiz artmaqla MBA auditoriyasının üçdəbirini təşkil edir.

Ancaq tədqiqatın müəllifləri onu da qeyd edirlər ki, ötən illərin translyasiya statistikasında oyunlara barlarda, otellərdə baxanlar nəzərə alınmayıb, yəni ötən illərin auditoriyası statistikada qeydə alınandan artıq olub.

Liqa sosial şəbəkələrdə də uğurlu nəticələr göstərib. “NBA TikTok” videoları 481 milyon baxış toplayıb ki, bu da ötən mövsümlə müqayisədə 305 faiz çoxdu. “Instagram Reels” 3,3 milyard baxışla 259 faizlik artıma nail olub. Müntəzəm çempionatın sonunda MBA-nın “instaqram” hesabının abunəçiləri 66 milyon idi. Liqa 2025-ci ilə bağlayacağı yeni televiziya müqaviləsi üzrə 75 milyard dollar qazanmağı planlaşdırır. ESPN və “Turner Sports” ilə olan indiki müqavilə 2016-25 aralığında MBA-ya ümumilikdə 24 milyard dollar qazandıracaq.