Portuqaliyanın son çempionu ''Sportinq''də İslam Slimani ilə bağlı ciddi problem yaşanır.

Təcrübəli əlcəzairli forvard komandadan qovulmaq üzrədi. Məsələ burasındadı ki, Slimani dünənki məşqə içkili vəziyyətdə gəlib. Baş məşqçi Ruben Amorim bundan xəbər tutan kimi onu məşqdən qovub!

Portuqaliya mətbuatının yazdığına inansaq, Slimani ilə bağlı yekun qərarı rəhbərlik verəcək. Hələlik isə o, ikinci komanda ilə məşq edəcək.

Qeyd edək ki, daha öncə ''Lester'', ''Nyukasl'', ''Fənərbaxça'', ''Monako'' və son olaraq ''Lion''un şərəfini qoruyan 33 yaşlı forvard ''Sportinq''ə qış fasiləsində gəlmişdi. O, lissabonluların heyətində 11 rəsmi oyuna 4 qol vurmuşdu. Onu da bildirək ki, bu, Slimaninin ikinci ''Sportinq'' macərasıdı. O, daha öncə 2013-16-cı illərdə paytaxt təmsilçisinin şərəfini qoruyub.