Region Liqası bəlkə də AFFA-nın son illərdə reallaşdırdığı ən yaxşı layihələrdən biridi.

Turnir, həvəskar status daşımasına baxmayaraq, bölgələri əhatə etdiyindən azarkeş marağı da yetərincə yüksəkdi. Bu üzdən mövsümün əvvəlində sözügedən turnirə qatılmaq istəyən çox sayda komandalar var idi ki, AFFA, daha dəqiq desək, assosiasiyanın nəzdində liqanın təşkilinə cavabdehlik daşıyan İşçi Qrupun üzvləri müraciətləri saf-çürük edəndən sonra iştirakçı sayı ilə bağlı qərar verdi. Saf-çürük dedikdə nə nəzərdə tutulurdu? Maliyyə dayanıqlığı, stadion, nəqliyyat, oyunların keçirildiyi zaman təhlükəsizliyin təmin olunması ilə bağlı zəmanət məktubu. Həmin sənəd isə rayon İcra Hakimiyyəti və ya komandanı himayəyə götürən şirkət tərəfindən təqdim olunalıydı. Həmin dönəmdə “Football-plus.az” saytına İşçi Qrupun üzvü Yusif Vəliyev “müraciətlərə baxıldı, zəmanət məktubu təqdim edən komandaların Region Liqasında iştirakına icazə verildi” şəklində açıqlama vermişdi. Ancaq nə oldu?

Qış fasiləsi ərəfəsində əvvəlcədən çempionluğa oynayacağı deyilən Quba “Şahdağ”ı maliyyə problemi səbəbindən fəaliyyətini dayandırdı. Bu gün pley-offda çıxış edən “Ağsu Siti”, “Füzuli”, “İmişli” kimi komandalar pulsuzluqdan əziyyət çəkirlər. Bölgə təmsilçilərinin rəhbərləri, azarkeşləri vaxtaşırı sosial şəbəkələr vasitəsi ilə təmsil olunduqları rayonların İcra Hakimiyyətlərinə, iş adamlarına, ictimaiyyət arasında tanınan insanlara müraciət edərək, komandaya maddi planda dəstək olmalarını xahiş edirlər. Hətta bank kartlarını paylaşaraq rayonun təmsilçisinə dəstək olmaq istəyənlərdən vəsaiti məhz həmin kartlara köçürmələrini istəyirlər. Bu yerdə şəxsən məni bir sual düşündürür. Zəmanət məktubları hardadı? Bu kağız parçası mövsümün ortasında bir işə yaramayacaqdısa, komandaların liqada iştirakına zamin duranlar çətin anda sinələrini geri çəkəcəkdilərsə...

Bu yerdə İşçi Qrupa yaxın, keçmişdə sosial şəbəkələrdə öz aləmində guya qəzəl söyləyən bəyə deyilən məşhur ifadəni xatırlatmaq istəyirəm: sizin zəmanət məktubunuza...

RƏŞAD