"Kimsə səhv edir ki, qapında qol görürsən" - Elmar Baxşıyev
Ölkə çempionatında 18-ci tura "Qarabağ" - "Qəbələ" oyunu ilə yekun vuruldu.
"Football-plus.az" saytının məlumatına görə, turun mərkəzi qarşılaşmasında qalib tərəf 5:1 hesabı ilə Qurban Qurbanovun komandası olub.
Matçdan sonra baş tutan mətbuat konfransında qonaqların baş məşqçisi Elmar Baxşıyev oyun haqda fikirlərini bildirib:"Bilirdik ki, çətin oyun olacaq. “Qarabağ”ın reklama ehtiyacı yoxdu. Çempionatımızın çempionluğa layiqli lideridi. Oyundan öncə də komandanı ağır oyuna hazırlayırdıq və inanırdıq ki, komanda “Qarabağ”a qarşı yaxşı oyun nümayiş etdirəcək. İlk hissədə düşündüklərimizi yerinə yetirməyə çalışırdıq. Təbii ki, “Qarabağ”ın imkan verdiyi qədər oynadıq. Amma “Qarabağ” fasilədən sonra tempi artırdı və müdafiədə boşluqlar verdik. Onlar bundan yararlandı".
Təcrübəli mütəxəssis oyunun qırılma nöqtəsi kimi Omar Hannin meydandan çıxmasını görüb:"Oyunöncəsi daha çox Omarın üstündə dayanmışdıq. Qırılma nöqtəsi “Qarabağ”ın bizə göstərdiyi təzyiqdən sonra baş verdi. "Qarabağ"ın imkan verdiyi qədər oynadıq".
Baxşıyev səhvləri yalnız qapıçı Nicat Mehabalıyevdə görmədiyini də bildirib:
"Yalnız qapıçının üstünə düşmək istəməzdim. Kimsə səhv edir ki, qapında qol görürsən. Nicat inandığım qapıçıdı. Qarşıdakı oyunlarda da onun üzərində dayanacam".
SƏNƏM FƏRHADOVA
