Bu gün Türkiyə çempionatının 28-ci turunun mərkəzi oyununda ''Fənərbaxça'' lider ''Trabzonspor''u qəbul edəcək.

Bu mövsüm əsil fırtına kimi əsən və bir çox rekordları alt-üst edən Trabzon təmsilçisi ən prinsipial rəqibini yenərək daha bir ilkə imza atmağa çalışacaq.
Abdulla Avcının dönəmində ''Trabzonspor'' superliqada səfərdə öz tarixinin 21 oyunluq məğlubiyyətsizlik rekordunu yeniləyərək 25 oyuna çatdırdı. Öz meydanında hazırda 20 oyunluq məğlubiyyətsiz seriyaya malik olan komanda rekord fərqlə turnir cədvəlinə başçılıq edir. Amma bir seriya var ki, fanatlar onun qırılmasını böyük səbirsizliklə gözləyirlər. Söhbət ''Fənərbaxça''ya qarşı səfərdəki qələbəsiz seriyadan gedir. Düzdü, 2020-də ''Trabzonspor'' Kadıköydə qalib gəlməyi bacarmışdı. Amma həmin qələbə kubok çərçivəsində qeydə alınmışdı. Superliqada isə ''Trabzonspor'' bu rəqibini İstanbulda son 24 ildə məğlub edə bilməyib! ''Bordo-mavililər''in çempionatda Kadıköydə son qələbəsi 1997-nin avqustun 23-də qeydə alınıb (3:1). O vaxtdan bu yana komandaların İstanbuldakı 24 matçının 13-də ''Fənər'' sevinibsə, 11-də bərabərlik qeydə alınıb.

Bu mövsüm artıq İstanbulda ''Qalatasaray''la ''Beşiktaş''ı məğlub edən ''Trabzonspor'' bu gün də qalib gələcəyi təqdirdə tarixində bir ilkə imza atacaq. Komanda ilk dəfə bir mövsümdə hər üç nəhəngi səfərdə yenmiş olacaq! Bundan başqa qalib gələcəyi halda Abdulla Avcı klub tarixində daha öncə yalnız Özkan Sümərin bacardığı bir uğuru yaşayacaq. Belə ki, ''Trabzonspor'' tarixində yalnız bir dəfə ''Fənər''i mövsümün hər iki oyununda yenməyi bacarıb. Bu hadisə 1990/91-də Sümərin dönəmində yaşanıb. Xatırladaq ki, bu mövsümün ilk dövrəsində qaradənizlilər doğma meydanda 3:1 hesabı ilə üstün olmuşdular. Sonda onu da bildirək ki, ''Trabzonspor'' Avcı ilə İstanbul klublarına qarşı keçirdiyi son 9 səfər oyununun heç birində uduzmayıb (8 qələbə, 1 heç-heçə).