“Leykers” yenə “Klippers”ə uduzdu, Lebron gücsüzlünü etiraf etdi
Son iki gündə keçirilən oyunlardan biri az qala hər kəsin maraq dairəsində idi.
Söhbət Los-Anceles derbisindən gedir. Maraqlı sual bu idi: “Leykers”, nəhayət, “Klippers”i məğlub edə biləcəkmi? İş ondadı ki, bu komandalar arasında keçirilən son 6 oyunun hamısında “gölməçəsevərlər” uduzmuşdu. 7-ci oyun da istisna olmadı. “Leykers”in ulduzu Lebron Ceyms məğlubiyyəti belə izah etdi:
“Klippers” bizdən yaxşıdı. Bu mövsüm həmişə hansısa çeyrəkdə bizi məhv edən problemlər üzə çıxıb. Adətən, 2-ci çeyrəkdə problemlə üzləşirdik, bu dəfə üçüncünü bərbad keçirdik”.
“Leykers”in 17 xalı və 8 ribaundu qələbəyə bəs etməyən oyun qurucusu Rassell Uestbruk da qəzəbini gizlədə bilmədi: “Leykers”in “Klippers” önündəki ardıcıl məğlubiyyətləri haqda nə düşünürəm? Heç nə. Bu mövsümlə bağlı heç bir gözləntim yoxdu”.
Müntəzəm çempionatda keçirdiyi son 8 oyundan yeddisində uduzan “Leykers”in baş məşqçisi Frenk Vogel isə bir qədər təmkinli danışdı: “Dözür və işi davam etdiririk. Vəziyyəti qaydasına salmaq üçün əlimizdən gələni əsirgəmirik. “Leykers” Entoni Devisin yoxluğunda qələbə qazanmağın yollarını axtarır. Biz bunu bacaracaq gücdəyik, ancaq hələ ki heç nə alınmır”.
Xatırladaq ki, “Leykers” “Klippers”i sonuncu dəfə 2020-ci ilin dekabrında məğlub edə bilib.
Bu arada MBA ötən ayın ən yaxşı basketbolçularının və məşqçilərinin adını açıqlayıb. “Dallas”ın oyun qurucusu Luka Donçiç Qərb, “Çikaqo”nun forvardı Demar Derozan isə Şərq konfransında hamını qabaqlayıb. Donçiç komandasının ötən ay keçirdiyi 10 oyunun 7-də qələbə qazanmasında yaxından iştirak edib. Onun orta göstəriciləri belədi: 34,7 xal, 10,3 ribaund və 8,8 ötürmə. “Çikaqo” isə ötən ay keçirdiyi 13 oyunun 8-də qalib gəlib, Derozanın orta göstəriciləri 34,2 xal, 6,2 ribaund və 5,2 ötürmə təşkil edib.
Ötən ayın ən yaxşı çalışdırıcılarının adına gəlincə, Qərb konfransında Kuin Snayder (Yuta), Şərqdə isə Ayme Udoka (Boston) seçilib. “Yuta” fevralda 9 oyun keçirib, 8 qələbə qazanıb. 55 yaşlı Snayder karyerasında 3-cü dəfə bu mükafata sahib çıxıb. Udokanın çalışdırdığı “Boston” ayboyu keçirdiyi 11 oyunun 9-da qalib gəlib. 44 yaşlı mütəxəssis karyerasında ilk dəfə ayın ən yaxşı məşqçisi sayılıb.
Daha bir maraqlı xəbər odu ki, “Denver”in mərkəz oyunçusu Nikola Yokiç komandası ilə mövcud müqaviləsinin müddətini artırmaq niyyətindədi. Yokiçin agenti Mişko Raznatoviçin dediyinə görə, 2021/22 mövsümü bitən kimi müqavilə yenilənəcək. Beləcə serbiyalı mərkəz oyunçusu 2023/24 mövsümündən başlayaraq qarşıdakı 5 ildə 258 milyon dollar qazana biləcək. Ötən mövsümün MVP-si olan Yokiç MBA tarixinəən yüksək məbləğli müqavilə imzalayan basketbolçu kimi düşəcək.
