Murad Musayev "Sabah"ı tərk edir? – AÇIQLAMA
Rusiyanın "Championat" nəşri “Sabah”ın baş məşqçisi Murad Musayevin tezliklə sabiq komandası “Karsnodar”ın “sükanı arxasına” keçəcəyi ilə bağlı xəbər paylaşıb.
Rusiyalı həmkarlarımız 39 yaşlı mütəxəssisi “öküzlər”in baş məşqçi postuna ən real namizəd sayır. Bu yerdə bildirək ki, Krasnodar təmsilçisini Daniel Farkeni çalışdırırdı. Alman mütəxəssis Rusiyanın Ukraynaya hərbi təcavüzünə etiraz olaraq komandanı bir rəsmi oyuna çıxarmadan srağagün istefa ərizəsini rəhbərliyə təqdim edib.
Söylənilənlərə aydınlıq gətirmək üçün “Sabah”ın mətbuat katibi Elnur Həmidovla əlaqə saxladıq: “Daha öncə də “Krasnodar”da baş məşqçi istefası gerçəkləşəndə oxşar xəbərlər yayılmışdı. Murad Musayevin uzun müddət Krasnodarın eyniadlı klubunun akademiyasında və əsas komandasında çalışmasını və müəyyən uğurlar qazanmasını nəzərə alsaq, hər dəfə bu klubda baş məşqçi ayrılığı yaşananda Rusiya mətbuatının belə iddia ilə çıxış etməsi başadüşüləndi. Ancaq klub daxilində bu məsələ müzakirə olunmayıb. Musayevin Krasnodara yollanması sırf şəxsi məsələ ilə bağlıdı. Bu günə olan hazırkı durum belədi”.
RƏŞAD
