Rusiyanın Ukraynaya hərbi təcavüzü bu ölkənin futboluna növbəti zərbələr vurub.

UEFA-dan sonra FİFA da şimal qonşumuza sanksiyalar tətbiq edib. Sanksiyaları xronoloji ardıcıllıqla nəzərinizə çatdırırıq.
Ali futbol təşkilatı fevralın 27-də Rusiya ərazisində beynəlxalq turnirlərin keçirilməsinə qadağa qoyub. Rusiyanın bütün yığmalarının ev oyunlarının neytral meydanda və azarkeşsiz təşkil olunacağı bildirilib. Qərara əsasən, bu ölkəni təmsil edən komanda istənilən yarışda Rusiya deyil, “Rusiya Futbol İttifaqı” (RFU) adı altında iştirak etməlidi. Rusiya komandalarının iştirak etdiyi matçlarda Rusiya bayrağı və ya himnindən istifadə də qadağan edilib.
FİFA-nın qərarı ilk növbədə Polşa Futbol İttifaqının (PFİ) narazılığına səbəb olub. PFİ ölkə yığmasının Rusiya millisi ilə neytral meydanda belə oynamayacağını bəyan edib. Məsələ ondadı ki, Polşa yığması DÇ-2022-nin pley-off mərhələsinin Rusiya ilə oyunundan imtina edib. PFİ-nin prezidenti Tsezari Kuleşa bazar günü özünün “tvitter” səhifəsində Rusiyanın Ukraynaya hərbi müdaxiləsinə görə bu ölkənin yığması ilə görüşmək niyyətində olmadıqlarını yazıb:

“Bu, yeganə düzgün qərardı. Artıq FİFA ilə ortaq mövqe irəli sürmək üçün danışıqlar aparırıq”.

Qeyd edək ki, pley-off mərhələsinin Rusiya və Polşa arasındakı yarımfinal oyunu martın 24-nə planlaşdırılıb. UEFA artıq cümə günü bu matçın neytral meydanda keçiriləcəyinə qərar vermişdi. Yeri gəlmişkən, Polşa millisinin kapitanı Robert Levandovski PFİ-nin mövqeyini dəstəkləyib:

“Bu, doğru qərardı! Hazırkı vəziyyətdə Rusiya ilə oyunu təsəvvür edə bilmirəm. Rusiyalı futbolçular və azarkeşlər buna görə məsuliyyət daşımırlar. Amma heç nə baş vermədiyini iddia edə bilmərik”.

Polşadan sonra rusların pley-offun finalındakı potensial rəqibləri sayılan İsveç və Çexiya yığmaları da ruslarla oyundan imtina edib. Artıq İsveç və Çexiyanın futbol qurumları da Rusiyanın DÇ-2022-nin pley-off mərhələsindən kənarlaşdırılması xahişi ilə FİFA-ya müraciət ediblər. Polşanın idman naziri Kamil Bortniçukun bu gün və ya sabah Sürixdə təşkilatın prezidenti ilə görüşü planlaşdırılmışdı. Onun Canni İnfantinonu Rusiya ilə pley-off matçının ləğvinin mövcud vəziyyətdə ən doğru addım olduğuna əmin etməyə çalışacağı bildirilmişdi.

Lakin onun bu cəhdinə ehtiyac qalmayıb. Çünki FİFA və UEFA dünən axşam saatlarında Rusiya komandalarının bütün turnirlərdən kənarlaşdırılmasına qərar verdi! Başqa sözlə, bu ölkənin klub və yığma komandaları qarşıdakı beynəlxalq yarışlarda iştirak hüququnu itirib.
Bu arada ruslarla oynamaq istəməyən ölkələrin sayı da artıb. İngiltərə, Uels, Norveç və Albaniyanın futbol qurumları Rusiyanın istənilən komandasına qarşı matçları boykot qərarı veriblər.

Ruslar üçün daha bir arzuolunmaz xəbər Almaniyadan gəlib. “Şalke-04” rəhbərliyi Rusiyanın “Qazprom” şirkəti ilə əməkdaşlığı dayandırıb. Bu haqda Helzenkirhen klubunun saytı məlumat yayıb. Klub müqaviləni vaxtından əvvəl ləğv etdiyini açıqlayıb. “Şalke-04” yeni titul sponsorunun adının tezliklə açıqlanacağını da bəyan edib.