“Sabah” - “Neftçi” matçı yenidən keçiriləcək? - RƏSMİ AÇIQLAMA
Xəbər verdiyimiz kimi, Azərbaycan kubokunun 1/4 finalının cavab matçında “Neftçi” səfərdə “Sabah”ı 3:1 hesabı ilə məğlub edib, növbəti mərhələyə yüksəlib.
Oyunda yaşananlar hamıya bəllidi. Qarşılaşmadan 2 həftədən çox vaxt keçsə də, AFFA İntizam Komitəsi hələ də qərarlarını açıqlamayıb. Qurumun rəhbəri Erkin Hüseynov ötən həftə “Futbol+” qəzetinə prosesin nə üçün gedikdiyi ilə bağlı açıqlama vermişdi. Həmin fikirləri diqqətinizə çatdırırıq:
“Bu qarşılaşmada neqativ hallar çox idi. Başverənləri bir-bir təhlil etdik. Elə epizodlar var ki, onlara baxmamışdıq. İndi bizə lazım olan videogörüntülər göndərilib. Hamısına bir-bir baxırıq. Kubok oyunları ilə bağlı qərarı gələn həftə açıqlayacağıq. İntizam Komitəsinin qərarları açıqlamamasının yeganə səbəbi araşdırmanın davam etməsidi. Onsuz da kubokla bağlı qərarlar premyer-liqa matçlarına şamil olunmur. Növbəti kubok oyunları isə apreldə baş tutacaq. Bütün məsələləri müzakirə etdikdən sonra qərar çıxarılacaq. Hələlik müzakirələr və yoxlamalar davam edir. Bu, 1 saatlıq iş deyil. Bütün epizodlara baxılmalı və təhlil olunmalıdı. Orda pul cəriməsi və bir neçə şəxsə cəza tətbiq olunacaq. Qərarlar dəqiq olmalıdı ki, daha sonra müzakirə edilməsin".
Görəsən, qurum yaşananları təhlil edib, bitirdi? Ümumiyyətlə, İntizam Komitəsi 1/4 final mərhələsinin cavab görüşlərində başverənlərlə bağlı qərarları nə vaxt açıqlayacaq? Sualımızı Erkin Hüseynova ünvanladıq:
“Azərbaycan kubokunun 1/4 finalının cavab görüşlərində, əsasən də “Sabah” - “Neftçi” qarşılaşmasında yaşananlarla bağlı qərar fevralın 25-də, yəni cümə günü komitənin iclasından sonra ictimaiyyətə açıqlanacaq. Matçda baş verən hadisələr geniş araşdırılıb, ayrı-ayrı epizodlar təhlil olunub. Bilirsiz ki, qurumun Əsasnaməsinə görə, iclas baş tutmadan qərarı mediaya açıqlamaq qayda pozuntusudu. Bütün məlumatları cümə günü AFFA və PFL-in rəsmi saytında oxuya bilərsiz. Bundan sonra hamı biləcək ki, kim nəyə görə cəzalanıb”.
Mediada yazılanlara inaqsaq, “Sabah” İntizam Komitəsinə Rəvan Həmzəzadənin matçı qərəzli idarə etdiyi, bu səbəbdən də görüşün yenidən keçirilməsi ilə bağlı müraciət edib. Bunun nə dərəcədə doğru olduğunu da Erkin Hüseynovdan soruşduq:
“Klub quruma rəsmi məktub göndərib. "Sabah" klubu tərəfindən oyunun təkrar keçirilməsi ilə bağlı müraciət olunmayıb. Onlar Rəvan Həmzəzadənin idarəçiliyindən narazı idilər. Sadəcə, qırmızı vərəqələrin ləğv edilməsini istəyirdilər. Mən hakimin oyunu qərəzli idarə edib-etməməsi ilə bağlı nəsə demə bilmərəm. Bu məsələlər AFFA Hakimlər Komitəsi tərəfindən həll olunmalıdı. Referinin oyunu düzgün idarə edib-etməməsi ilə bağlı məsələni onlar araşdırmalı və cavab verməlidi. Qarşılaşmanın yenidən keçirilməsi isə mümkün deyil. Çünki həmin görüşdə kütləvi iğtişaş baş verməyib. Ya da hava şəraiti ilə bağlı hansısa problem yaşanmayıb. Oyun yarımçıq dayındırılmayıb. Belə məsələlər olduqda qarşılaşma yenidən keçirilə bilər. Sadaladıqlarımızdan hansısa biri olmayıbsa, İntizam Komitəsi matçın yenidən keçirilməsi ilə bağlı qərar verə bilməz”.
İLKİN SULTANLI
