“Formula-1” komandalarından “Mersedes” 2022 mövsümü üçün F1 W13 adlanan yeni maşınını təqdim edib.

Yeni mövsümdə komandanın şərəfini Lüis Hemiltonla Corc Rassell qoruyacaq. Buna qədər “Uilyams”ın pilotu olan Rassell Almaniya komandasında ilk mövsümünü keçirəcək. O, “Alfa Romeo”ya keçən Valtteri Bottasın yerini tutacaq.
Təqdimat mərasiminə qatılan Hemilton 2021 mövsümü bitəndən sonra “Formula-1”dən ayrılmaq variantını nəzərdən keçirmədiyini bildirib:

“Heç vaxt getməyə hazırlaşdığımızı deməmişəm, işimi sevirəm. Əlbəttə, mənim üçün çətin dönəm idi. Bir müddət kənarlaşmalı, gələcəyə fokuslanmalıydım. Ailəmlə vaxt keçirdim, əzizlərimin yanında gözəl anlar yaşadım”.

Hemilton 2021 mövsümünün sonluğu haqda da danışıb:

“Ferstappen final yürüşünün nəticəsinə görə günahkar deyil. O, ələ düşən imkanı nəzərə alaraq, nə lazım idisə, onu da etdi. Maks əla rəqibdi, ötən il olduğu kimi, yenə mübarizə aparacağıq. Maksla heç bir problemim yoxdu. İrəli baxıram, keçmişdə qalmamışam”.

Xatırladaq ki, ötən mövsümün sonuncu dövrəsində çempionluğu Ferstappenə təhvil verən Hemilton şəxsi hesabda 2-ci yeri tutmuşdu. 37 yaşlı britaniyalı “Formula-1”in yeddiqat qalibidi. Yeni mövsümün ilk mərhələsi isə martın 18-20-si aralığında Bəhreyndə keçiriləcək.

Bu arada “Mersedes”in rəhbəri Tofo Volff yeni mövsümlə bağlı gözləntilərini bölüşüb:

“Mövsümlərarası fasilə çox qısa oldu. İki ay ərzində tam bərpa olunmaq mümkün deyil. Ancaq bu da normaldı, yarış meydanına qayıtmaq istəyirik. Əlbəttə, Əbu-Dabi mərhələsində şəxsi hesabda liderliyi əldən verməyimiz çox məyusedicidi. Başladığımız işi davam etdirmək istəyirik, ancaq gözəl anlayırıq ki, bizə uğurla bağlı hansısa təminat yoxdu. FIA-in tətbiq edəcəyi yeniliklər ümid verir. İndi yarış direktorluğunun strukturu daha möhkəm olacaq, dəstək qazanacaq”.

Xatırladaq ki, fevralın 17-də “Formula-1”in yarış direktoru Maykl Masinin postunu tərk etdiyi açıqlanıb.