Xəbər verdiyimiz kimi, futzal üzrə millinin hücumçusu Rafael Vilela karyerasını Rusiya “Tümen”ində davam etdirəcək.

Buna qədər İspaniyanın “Palma Futsal” klubunda çıxış edən Vilela artıq yeni komandası ilə müqavilə imzalayıb və debüt matçına çıxıb. Həm transferi, həm də yeni klubu ilə bağlı forvard azfutzal.az-a müsahibə verib.

- Transferinlə bağlı hansı məqamları qeyd etmək istərdin?

- Əlbəttə, keçidimdən məmnunam. Rusiya çempionunun təklifi təkcə maddi şərtlərə görə cəlbedici olmadı. Peşəkar və iddialı bir klubla anlaşdım. Bu komanda da hər mövsüm çempion olmaq uğrunda mübarizə aparır, mütəmadi olaraq UEFA Çempionlar Liqasında iştirak edir. Bu məqamlar da təklifi müsbət dəyərləndirməyimdə həlledici oldu.

- “Tümen”dən nə vaxt təklif almışdın?

- Danışıqlar Avropa çempionatının final mərhələsindən əvvəl başlamışdı. Ancaq müqavilədəki müvafiq bəndə uyğun, vaxtından əvvəl klubdan gedəcəyim təqdirdə kompensasiya ödəməli idim. Buna görə danışıqlar bir müddət donduruldu. Ancaq Niderlandda təşkil olunan Avropa çempionatının final mərhələsindəki uğurlu çıxışım, vurduğum qollar məsələni yenidən aktuallaşdırdı. Yekun isə ortadadı. Lazım olan məbləğ ödənildi və “Tümen”ə keçdim.

- İspaniya və Rusiya çempionatlarında tələblər fərqlidi. Tələblərə cavab vermək, uyğunlaşmaq baxımından hansısa çətinliklə qarşılaşa bilərsən?

- Bir müddətdi komandanın düşərgəsindəyəm. Gördüklərimə əsasən deyə bilərəm ki, adaptasiya uzun çəkməyəcək. Çempionatlara gəldikdə, bəli, fərq, tələblər çoxdu. İspaniyada əsasən taktiki və texniki məqamlar ön planda dayanır. Fərdi qabiliyyət çox vacibdi. Amma Rusiyada mübarizəyə diqqət yetirirlər. Eyni zamanda fiziki hazırlığın da yüksək səviyyədə olmalıdı. Oyunların müddətində də fərq var. İspaniyada bir hissə 20, Rusiyada isə 25 dəqiqə davam edir.

- “Tümen” həm də apreldə UEFA Çempionlar Liqasının “Dördlər final”ında iştirak edəcək. Səhv etmirəmsə, ilk dəfə bu mərhələdə iştirak etmək şansın yaranıb.

- Buna görə şadam. İstənilən futzalçı belə bir yarışın iştirakçısı olmaq istəyir. Əlbəttə, ilk işim komandama kömək etmək olacaq. Arzulayıram ki, debüt ilimi Çempionlar Liqasının qalibi kimi başa vurum.

- Bunun üçün “Tümen”in şansı realdı?

- Bu mərhələdə iştirak ediriksə, deməli, komandam güclüdü. Şans iştirakçıların hər biri üçün var, qalır hazırlaşmaq. Hər bir oyunun öz təyinatı, tarixçəsi var. Komandam güclüdü və zamanı çatanda bu oyunlara da lazımi qədər hazırlaşacaq.

“Football-plus.az”