"Bu cür güclü rəqiblərə qarşı mübarizə aparmışıq" - Qurban Qurbanov
Sabah "Qarabağ" Fransada Konfrans Liqasının pley-offunda "Marsel"in qonağı olacaq.
Ağdam təmsilçisinin baş məşqçisi Qurban Qurbanov bu gün qarşılaşmadan öncə keçirilən mətbuat konfransında iştirak edib.
Təcrübəli mütəxəssis əvvəlcə görüş haqda fikirlərini bildirib.
“Çox yaxşı komandaya qarşı oyunumuz olacaq. Böyük təcrübəsi olan rəqiblə qarşılaşacağıq. “Marsel”in yaxşı baş məşqçiləri və futbolçular var. Öz komandama güvənirəm. Çox istəkliyik. Burda layiqli və yaxşı oyun göstərmək istəyirik. İlk dəfədi ki, qrup mərhələsini keçməyi bacarıb, belə görüşə hazırlaşmışıq. İnanıram ki, futbolçularım özlərinin ən yaxşı oyunlarını göstərməyə çalışacaqlar. İlk matçda rəqibi daha yaxından tanıyacağıq. Onların gücünü bilsək də, bu qarşılaşmadan sonra tam əminlik yaranacaq. Bura azarkeşlərimizi sevindirmək, yaxşı oyun nümayiş etdirmək üçün gəlmişik”.
Qurban Qurbanov daha sonra jurnalistlərin suallarını cavablandırıb...
- İlk dəfədi ki, “Qarabağ” qrup mərhələsindən sonra avrokuboklarda mübarizə aparır. Futbolçularda həyəcan varmı? Belə vacib görüşə hazırdılarmı?
- Həyəcan var. Hər oyundan öncə, həm futbolçular, həm də mən bu hissi keçiririk. Sadəcə, ümid edirəm ki, həyacan bizim oyunumuza təsir etməsin. Rəqibin gücünə görə yox, qrupdan çıxmışıq deyə sevinci hissi keçiririk. Həqiqətən hamı səbirsizliklə oyunu gözləyir. Əlbəttə ki, belə oyunlarda təcrübəmiz var. Bu cür güclü rəqiblərə qarşı mübarizə aparmışıq. Sadəcə, qrup mərhələsindən sonra belə komandaya qarşı mübarizə oynamamışdıq. İnanıram ki, bu, futbolçularda daha çox istək, həvəs yaradacaq. Bunun həddindən artıq çox olmağını da istəmirəm. Ola bilər ki, istək komandanın oyununa problem yaratsın. Çalışmışıq ki, hisslərimizi orta səviyyədə saxlayaq. Sadəcə, fikrimizi rəqibin oyun üslübuna, futbolçularına, onların meydanda nə etmək istədiklərinə yönəltməyə çalışacağıq. İnanıram ki, bu həyacan bizim xeyrimizə olan amildi.
- “Marsel” son oyunlarda sistemi dəyişdirib. Sizə bu görüşə hazırlaşmaq çətin olmayıb ki?
- "Bu, bizə çətinlik yarada bilər. Çünki bu cür komandalara qarşı nadir hallarda oynayırıq. Rəqib bunu çox məharətlə edir. Daha çox diqqət yetirməli olduğumuz elementlərdən biri budu. Məqsdimiz meydanda öz oyunumuzu göstərməkdi. Hər bir futbolçumuz bu matçın faydasını görəcək və verilən tapşırıqları dəqiqliklə yerinə yetirəcək".
