Ötən şənbə “Bank Respublika Arena”da baş tutan oyunda “Neftçi” “Sabah”ı 3:1 hesabl ilə məğlub edərək kubokdan kənarlaşdırdı.

Hər iki komandanın azarkeşləri oyunboyu dəstək nümayiş etdirdi. Baş verən insidentlərdən sonra mediada “Neftçi” azarkeşlərinin “Sabah”ın fanqrupu “Soldatı Di Sabah”ın pankartını götürməsiylə bağlı xəbərlər yayıldı. Bu məsələyə və bizi maraqlandıran başqa suallara cavab tapmaq üçün “Soldatı Di Sabah”ın rəhbəri Rəşid Məmmədovla danışdıq:

- “Sabah”la tanışlığınız necə yarandı?
- Vaxtilə Masazırda yaşayırdım. “Sabah”la tanışlığım da tələbəlik illərimin ilk vaxtına, 2018-ci ilə təsadüf edir. Stadion yaşadığım əraziyə yaxın olduğundan komandanın oyunlarına getməyə başladım. Sadəcə, maraq üçün. Amma komandanın oyunu məndə həm kluba, həm də futbola maraq yaratdı. Bundan sonra mənlə birgə Masazırdakı və universitetdəki dostlarım oyunlara gəlməyə, beləcə fanat qrupumuz formalaşmağa başladı.

- Fanklub olaraq necə formalaşdız?
- “Soldati Di Sabah”ın yaranmasının da çox maraqlı və şanlı bir hadisəyə bağlı səbəbi var. Masazırdakı və universitetdəki dostlarımızla birgə fanklubun yaradılması ilə bağlı uzun müzakirələr apardığımız ərəfədə cəbhədə də əsgərlərimiz şanlı tarix yazırdı. Məhz bu şanlı zəfərin, qələbənin sevinci, həmçinin “Sabah”a və futbola olan böyük marağımız “Soldati Di Sabah” fanklubunu yaratmağa təkan verdi. Qrupun adını dəqiqləşdirəndən sonra müraciət etdik Novruz bəyə. O, azərkeşlərlə bağlı bütün məsələlərə nəzarət edir. Ondan bizə klubun atributlarını, bayraqları və başqa ləvazimatları təşkil etməsini xahiş etdik. Rəhbərliyin də müsbət cavabı və bizi atributlarla təmin etməsi nəticəsində “Soldati Di Sabah” fəaliyyətə başladı. Klub nümayəndələrinin maraqlanması və təşəbbüsümüzü xoş qarşılaması bizi həqiqətən çox sevindirdi.

- “Sabah” sizə dəstək olur?
- Müntəzəm bizlə maraqlanırlar. Klubun sosial yönümlü olması, gənclərə dəstək verməsi, təşəbbüslərimizi xoş qarşılaması bizdə kluba sevgini və rəğbəti daha da artırdı.

- Qrupunuz neçə nəfərdən ibarətdi?
- Bizdə əsas tayfa deyilən bir qrup var ki, 50 nəfərdən ibarətdi. Bu kütlə klubun ilk yarandığı gündən bir yerdədi. Ancaq gördüyünüz kimi, komandanın yaxşı oyun sərgiləməsi, baş məşqçinin düzgün strategiyası nəticəsində qələbələrin sıralanması azarkeşlərin sıralarının genişlənməsinə səbəb olur. “Soldati Di Sabah” ölkədəki bir çox fanklubdan fərqlənir. Gənclər arasında da “Sabah”a gündən-günə maraq daha da artır. Bu hər oyunda özünü say baxımından göstərir. Hər matçda sıralarımıza yeni gənclər, azarkeşlər qoşulur. Sayımız bəzi oyunlarda hətta 200-ə qalxır.

- “Sabah”dan əvvəl ölkəmizdə hansısa kluba rəğbətiniz olub?
- Qeyd etdiyim kimi, futbola o qədər də marağım olmayıb. Futbolla tanışlığım məhz “Sabah”la başladı və bu sevgi onunla da davam etməkdədi. Bir sözlə, məndə Azərbaycan futboluna maraq yaradan məhz “Sabah”, onun sosialyönümlü, gənclərə dəstək verməsi olub.

- Komandanın çıxışı sizi qane edir?
- Komandamızın çıxışı həqiqətən bizi qane edir. Kifayət qədər gözəl oyun sərgiləyirlər. Bunu ardıcıl qələbələrimiz də sübut edir. Ancaq bu o demək deyil ki, biz daha yaxşısını gözləmirik və əmin deyilik ki, olmayacaq. Əminliklə deyə bilərəm ki, komandamız gündən-günə daha yaxşı çıxış edir və mükəmmələ doğru gedir.

- “Sabah”ın “avrokubok zonası”na qalxa biləcəyini düşünürsüz?
- Təkcə düşünmürük, hətta bunu əminliklə deyirik. “Sabah” mütləq öz gücünü göstərəcək.

- Azərbayacan kubokunda “Neftçi”yə qarşı ağır oyun keçirdiz. Komanda hesabda öndə olmasına rəğmən, yekunda 1:3 hesabı ilə uduzdu. Bu qarşılaşma barədə nə deyə bilərsiz? Başqa xoşagəlməz hadisələrin yaşandığı da deyilir...

- Oyun haqda fikirlərimizi tribunada bildirdik. Biz də bu xəbərlərin şahidi olduq. Ancaq hamısı şayiədi. “Soldati Di Sabah”ın pankartı oğurlanmayıb, hər şey qaydasındadı. Bu hadisə “Sabah Ultras” fanklubunun başına gəlib. Onlar yeni yaranan qrupdu və sayları azdı. Məhz buna görə, əfsuslar olsun ki, pankartlarını qoruya bilmədilər. Bu fanklubun bizim qrupla ilə heç bir əlaqəsi yoxdu. “Soldati Di Sabah”ın heç bir fanklubla problemi yoxdu. Hətta dostluq münasibətlərimiz var.

SƏNƏM FƏRHADOVA