“Futbol+” və əməkdaşı ilin ən yaxşıları sırasında!
Fevralın 13-də Azərbaycan İdman Jurnalistləri Assosiasiyası (AİJA) 2021-ci ilin idman laureatlarını mükafatlandırdı.
“Qafqaz Point Hotel”də keçirilən tədbirdə çıxış edən qurumun prezidenti Eldar İsmayılov ölkəmizdə idmana dövlət səviyyəsində diqqət və qayğı göstərildiyini, idmançıların beynəlxalq arenalarda qazandığı nailiyyətləri qeyd etdi. AİJA-nın ötən illərdəki fəaliyyəti barədə məlumat verən İsmayılov 1995-də yaradılan qurumun Beynəlxalq İdman Mətbuatı Assosiasiyasında (AIPS) ölkəmizi uğurla təmsil etdiyini vurğuladı. Həmçinin qeyd etdi ki, assosiasiya 1996-cı ildən başlayaraq, idman mətbuatı və jurnalistlər arasında fərqlənənləri təltif edir. Sonra AİJA-nın fəaliyyətindən bəhs edən videoçarx nümayiş etdirildi və tədbirin aparıcısı Fərid Ramazanov qalibləri elan etdi:
İlin idman adamı - Fərid Qayıbov
İlin idman xadimi - İlqar Rəhimov
İlin futbol xadimi - Əmrah Çəlikəl
İlin idmançısı
(kişilər)
1. Rafiq Hüseynov, güləş
2. Rafael Ağayev, karate
3. Hacı Əliyev, güləş
(qadınlar)
1. İrina Zaretska, karate
2. İrina Kindzerska, cüdo
3. Zöhrə Ağamirova, bədii gimnastika
İlin klubu - “Qarabağ”
İlin məşqçisi - Qurban Qurbanov (“Qarabağ”)
İlin futbolçusu - Emin Mahmudov (“Neftçi”)
İlin legioneri - Mahir Emreli (“Dinamo”, Zaqreb)
İlin idman jurnalisti
Telekanallar üzrə - Sənan Abdullayev (Xəzər TV)
Radio üzrə - Rüfət Nadirli (“Fərqli radio”)
Qəzetlər üzrə - Rəşad Qasımov (“Futbol+”)
Saytlar üzrə - Həbib Aslanov (Sportinfo.az)
Xarici dilli media üzrə - Elmir Əliyev (Haqqın.az)
Sosial şəbəkələr - Rəşad Ergün
İlin gənc idman reportyoru - Fuad Eldarov (İdman TV)
İlin televiziya aparıcısı - Fəridə Abdulla (İTV)
İlin idman şərhçisi – Elnur Məmmədli (CBC Sport), Tural Dadaşov (İTV)
İlin fotojurnalisti - Rasim Hüseynov
İlin informasiya agentliyi - AzərTAC
İlin telekanalı - İTV
İlin radiosu - Fərqli radio
İlin qəzeti
İdman qəzetləri üzrə – “Futbol+”
İctimai-siyasi qəzetlər üzrə – “525-ci qəzet”
İlin internet saytı
İdman saytları üzrə – qol.az
İctimai-siyasi saytlar üzrə – oxu.az
İlin mətbuat katibi
Qurumlar üzrə – Vamiq Nəsirov (AMADA)
Federasiyalar üzrə – Mahal Məmmədov (AFF)
Futbol klubları üzrə – Elnur Həmidov (“Sabah”)
Mükafatlar təqdim olunarkən maraqlı hadisələr yaşandı. Tədbirdə Vətən müharibəsi şəhidi, baş leytenant Səid Rəşidzadənin atası Nofəl Qasımov ilin məşqçisi mükafatına layiq görülən “Qarabağ”ın baş məşqçisi Qurban Qurbanova oğlunun hərbi baş geyimini və poqonlarını hədiyyə etdi. Bu zaman mərasimdə duyğusal anlar yaşandı. “Qarabağ”ın mətbuat xidmətinin rəhbəri Gündüz Abbaszadə dostunun atasının jestindən kədərlənərək göz yaşlarını saxlaya bilmədi. Qurbanov bu mənalı və dəyərli hədiyyəyə görə minnətdarlığını bildirib, vətən uğrunda canını fəda edən Səid Rəşidzadənin, o cümlədən bütün şəhidlərimizin xatirəsinin daim xalqımızın qəlbində yaşayacağını qeyd etdi. Gündüz Abbaszadə isə təmsil etdiyi klub adından ötən il dünyasını dəyişən, tanınmış şərhçi Elnur Əşrəfoğlunun övladı Mətinə hədiyyələr təqdim etdi:
“Bu gün tədbirdə hamımızın sevimlisi, idman jurnalistikasına ömrünü bəxş edən şəxsin övladı iştirak edir. Söhbət Elnur Əşrəfoğlunun övladı Mətindən gedir. Bilirik ki, o, qatı “Qarabağ” azarkeşidi. Bu səbəbdən də Mətinə 2 hədiyyə təqdim etmək istəyirik. Bunlardan biri “Qarabağ”ın Konfrans Liqasının qrupdakı oyunlarının birində oynadığı topdu. Təbii ki, bunun üzərində bütün futbolçularımızın imzası var. İkinci hədiyyəmiz isə Abdulla Zubirin formasıdı. Mətin balamız onun azarkeşidi. Təbii ki, Zubir bunu diqqətdən qaçıra bilməzdi. Öz imzalı formasını Mətinə hədiyyə edir”.
Tədbirdə iştirak edən Elnur Əşrəfoğlunun qardaşı Rəşad Şükürov “Qarabağ” rəhbərliyinə və Qurban Qurbanova diqqətdən dolayı təşəkkürünü bildirdi.Daha sonra səhnəyə ilin ən yaxşı futbolçusu Emin Mahmudov və ən yaxşı legioneri Mahir Emrelinin anası Elnurə xanım çıxdı. “Neftçi”nin kapitanı bu mükafata layiq görüldüyünə görə AİJA-ya təşəkkürünü bildirdi. Elnurə xanım isə duyğularını tədbirdəkilərlə belə bölüşdü:
“Həqiqətən çox sevincliyəm. Mahir “Legiya”nın heyətində də ilin ən yaxşı legioneri seçilmişdi. Azərbaycanda da bu mükafata layiq görüldü. Ümid edirəm ki, oğlum uğurlarını davam etdirəcək. Mahirin bir məqsədi var: azərbaycanlı gənc futbolçulara örnək olmaq. Təbii ki, öz uğurlu çıxışı ilə bu istəyini həyata keçirmək niyyətindədi. Oğluma bu yolda kömək, dəstək olan xüsusi biri var. Söhbət onun keçmiş hocası Qurban Qurbanovdan gedir. Mahir “Qarabağ”da çıxış edəndə, legioner həyatı yaşamağa başlayandan onun məsləhəti ilə hərəkət edir. Oğlumun bu yerlərə gəlməsində Qurban Qurbanovun xüsusi əməyi var. Mən bir ana kimi sizə minnətdarlığımı bildirirəm. Əmin olun ki, Mahir sizin üçün darıxır. Amma qorxduğu üçün zəng etmir (gülür). Bir daha mükafata görə AİJA-ya təşəkkür edirəm. Ümid edirəm ki, Mahir uğurluları ilə xalqımızı sevindirməyə davam edər”.
Daha bir maraqlı hadisə isə ilin ən yaxşı şərhçiləri nominasiyasında qaliblər səhnəyə çıxarkən yaşandı. Fərid Ramazanov həmkarları Elnur Məmmədli ilə Tural Dadaşovu təbrik edib, bunları söylədi:
“Ola bilər ki, telekanallar arasında rəqabət olsun. Amma şərhçilər arasında dostluq və yoldaşlıq münasibəti var. “İdman TV”nin əməkdaşı olsam da, həmkarlarımı səmimi qəlbdən təbrik edirəm. Özüm mükafat almış qədər sevincliyəm. Fərqi yoxdu, qalib gələn kimdi, hansı telekanalın əməkdaşıdı. Əsas odu ki, şərhçilər də bu tədbirdə iştirak edir və mükafatçılar sırasında yer alıblar”.
Tədbir bütün qaliblərin bir yerdə xatirə şəkli çəkdirməsi ilə yekunlaşdı. Təbii ki, bizim üçün də iştirak etmək önəmli idi. Çünki “Futbol+” “ilin ən yaxşı qəzeti” nominasiyasında qalib elan olunmuşdu. Bundan əlavə, əməkdaşımız Rəşad Qasımov qəzetlər üzrə ilin ən yaxşı idman jurnalisti adına layiq görüldü. Uzun illərdi Azərbaycan idmanına xidmət edən “Futbol+” qəzetinin və əməkdaşlarının diqqətdə saxlanılması bizi sevindirir. AİJA-ya həssaslığından dolayı təşəkkürümüzü bildiririk.
İLKİN SULTANLI
