"Qəbələdə futbol ab-havası fantastikdi" - Aleksey Baqa
Azərbaycan kubokunun 1/4 finalının cavab matçında "Qəbələ" "Sumqayıt"la heç-heçə edib - 1:1.
Qarşılaşmadan sonra keçirilən mətbuat konfransında "kimyaçılar"ın baş məşqçisi görüşü şərh edib:
"İlk oyundan fərqli olaraq cavab matçı daha maraqlı keçdi. İkinci hissədə komanda yaxşı hücumlar təşkil edib, rəqib üzərində təzyiq yaratdı. Təbii ki, çoxlu qayda pozuntuları, vərəqələr oldu. Bu da oyunun necə maraqlı keçdiyini göstərir. Nəticə bizə qane etməsə də, komandamın oyunundan razı qaldım. Futbolçuların göstərdiyi əzmdən, yüksəl oyun performansından razı qaldığımı deyə bilərəm. Bu, bizim inkişaf etdiyimizi göstərir. "Qəbələ"ni növbəti mərhələyə vəsiqə qazanması münasibəti ilə təbrik edirəm".
- Aleksey Baqa üçün mövsümün qalan hissəsi üçün hədəf nə olacaq?
- Komandamızda hər bir futbolçu peşəkardı. Onların bizimlə müqaviləsi var. Təbii ki, premyer-liqada bütün oyunlar bizim üçün finala bərabər olacaq. Həm qarşılaşmalarda, həm də məşqlərdə üzərimizə düşənin 100 faiz yerinə yetirməyə çalışacağıq.
- Qəbələdəki futbol ab-havası haqda fikirləriniz necədi?
- Dünən məşqdən sonra mehmanxanaya piyada getdim. Özüm gözlərimlə hər şeyi görmək istəyirdim. Qəbələdə infrastruktur, meydanın şəraiti, ab-hava fantastikdi.
- Komanda yaxşı hücumlar qura bilmir. Bunun səbəbi nədi? Hücumçuların səviyyəsi aşağıdı, yoxsa futbolçular nədənsə çəkinirlər?
- Qeyd etdiklərinizin hamısı doğrudu. Sadəcə, onu deyə bilərəm ki, "Sumqayıt" qol epizodları yaradır. Oyunların statistikasına baxanda da bunu demək olar. Lakin epizodların qola çevrilməsində problem yaşayırıq. Bunun üzərində mütləq işləyəcəyik.
RƏŞAD, Qəbələ
