Premyer-liqada qış fasiləsindən sonra VAR-dan istifadə olunacağı deyilsə də, bu baş vermədi.

Oyunlarda isə ciddi səhvlər qeydə alındı desək, yanılmarıq. Ümumiyyətlə, hakimlər 4 qarşılaşmada futbolçulara 24 vərəqə göstərdilər. Bunlardan 23-nün rəngi sarı, 1-nin rəngi isə qırmızı oldu. Turun ən centlmen komandası adının iki sahibi var. "Qəbələ" və "Səbail"in cəmi 1 futbolçusu vərəqə aldı. Həftənin ən kobud komandası isə "Keşlə" oldu. "Qırmızı-ağlar"ın futbolçuları 6 sarı, 1 qırmızı vərəqə ilə cəzalandı. Reportyorlarımızın qeydlərinə keçid alaq...

Neftçi - Qarabağ, KAMAL UMUDLU
Son illərin ən maraqlı qarşılaşmalarından birini izlədik. Kamal Umudlu da görüşü yaxşı idarə etdi. Lakin gənc referi sona yaxın buraxdığı səhvlə görüşün taleyini həll etdi. Riçard Almeyda Patonu əli ilə vurdu. Hakim oyunu saxladı, lakin “Qarabağ”ın futbolçusunu vərəqə ilə cəzalandırmadı. Halbuki Almeydaya ən azı sarı vərəqə göstərməliydi. Belədə braziliyalı qovulacaq, “Qarabağ” azlıqda qalacaqdı. Bundan sonra nələr olacağını söyləmək çətindi.

Keşlə - Zirə, İNQİLAB MƏMMƏDOV
Turun ən maraqsız qarşılaşmasında hakimlik baxımından diqqəti çəkən məqam olmadı. Sadəcə, İlkin Qırtımovun 35-ci dəqiqədə etiraza görə sarı vərəqə ilə cəzalanması və 39-cu dəqiqədə ikinci dəfə “sarı” almaqla qovulması ən çox narazılıq doğuran məqam idi. Bununla bağlı Qırtımov qəzetimizə açıqlama verib. Sadəcə, orda bildirir ki, mən hakimi söyməmişəm. Amma referinin qərarına etiraz etmək belə sarı vərəqənin verilməsinə səbəbdi. Bu qərara görə uzun müddətdi premyer-liqada matç idarə etməyən İnqilab Məmmədovu alqışlamaq lazımdı. Görüşdə başqa mübahisəli nəsə yaşanmadı. Ümumilikdə Məmmədov hadisələrin mərkəzində olmağı bacarırdı.

Sabah - Qəbələ, ELÇİN MƏSİYEV
Məsiyev oyunu makimum səhvsiz idarə etdi. Referi görüşün tempini aşağı salmamağa çalışırdı. Epizodların hər birinə yaxın idi. Oyun sürətli başladığından ilk dəqiqələrdən xırda follar oldu. Məsiyev bu məqamlarda doğru qərarlar verdi. Elmar Baxşıyevin və “Qəbələ” futbolçularının etirazına baxmayaraq, referi sarı vərəqələrdən çox az istifadə etdi. Matçda ciddi etiraz doğuran məqamlar olmasa da, 13-cü dəqiqədə Asif Məmmədov şortunu yuxarı çəkib qayda pozuntusu olduğundan şikayətləndi. Lakin hakim onun iradını qulaqardına vurdu. Məsiyev bu epizodda heç olmasa, cərimə zəbəsi qeydə ala bilərdi. Ancaq onun oyunboyu verdiyi qərarılar, şübhəsiz, düzgün idi. “Qəbələ”nin məşqçilərinə göstərdiyi sarı vərəqələr yalnız həmin məqamdan qaynaqlanmırdı. Rsim Ramaldanov bir neçə dəfə texniki zona qaydasını pozmuşdu. Elmar Baxşıyev isə dəfələrlə hakimin qərarlarına sərt etiraz etdi.

Səbail – Sumqayıt, RƏVAN HƏMZƏZADƏ
Bizə görə, Rəvan bəyin idarəçiliyi tam bir fiasko idi. Rauf Əliyevin kobud söyüşünü gözdən qaçıran referi Aleksey Baqanın və köməkçisi Valeri Tarasenkonun hərəkətlərini addım-addım izləyirdi. Rəvan bəy Tarasenkoya 36-cı dəqiqədə sarı vərəqə göstərərkən “no distribute again” (bir daha danışma) deməklə sərt üzünü ortaya qoydu. Həmzəzadə Əli Qurbaninin Qoxa ilə mübarizədə yerdə qaldığı və Mirzəbəyovun Sadıxovun formasından dartdığı epizodda düzgün qərar vermədi. Referi 43-cü dəqiqədə meydanda düzgün mövqe seçməməklə “Səbail”in perspektivli hücumunun qarşısını aldı, daha bir epizodda laysmanla əlaqənin yerində olmaması üzündən aut əl dəyişdi, bir sözlə, idarəçilik normaldan çox-çox uzaq idi.