Son günlər Teo Ernandes və İsmael Bennaser ilə müqaviləni yeniləyən “Milan”da daha iki futbolçunun məsələsinə aydınlıq gəlib.

Matteo Qabbya ilə İtaliya klubu arasındakı danışıqlar sona çatıb. İtalyan futbolçu ilə müqavilə də yenilənib. 22 yaşlı müdafiəçinin imzaladığı yeni sözləşməsinin müddəti 2026-ci ilin yayınadək nəzərdə tutulub. Qabbya “Milan”ın yetirməsidi. Mərkəz müdafiəçisi indiyədək əsas komandada 31 oyunda iştirak edib.

Matteodan fərqli, “Milan”ın aparıcı futbolçularından Frank Kessi klubdan ayrılacaq. Bu barədə jurnalist Nikolo Skira məlumat yayıb. O, tərəflərin müddəti yayda sona çatacaq müqaviləni yeniləməmək qərarına gəldiklərini bildirib. Başqa sözlə, 25 yaşlı yarımmüdafiəçi komandanı azad agent kimi tərk edəcək. Kessi qırmızı-qara formanı 2017-ci ildən geyir. Afrikalı futbolçu bu mövsüm A seriyasında 18 matçda meydana çıxıb və 5 qol vurub.