Bilindiyi kimi ''Adana Dəmirspor''a transfer olunduqdan bu yana sanki ikinci gəncliyini yaşayan Mario Balotelli təxminən 3,5 illik fasilədən sonra İtaliya yığmasına dəvət alıb.

Bu arada məlum olub ki, son Avropa çempionunun baş məşqçisi Roberto Mançini ''Super Mario''nu öz gözü ilə izləmək üçün Adanaya gələcək. Bu xəbəri türkiyəli həmkarlarımıza adanalıların prezidenti Murat Sancak çatdırıb. Hazırda turnir cədvəlində 3-cü pillədə qərarlaşan debütant superliqada növbəti oyununu bazar ertəsi, fevralın 14-də öz meydanında ''Beşiktaş''a qarşı keçirəcək. Mançininin Adanaya gələrək həmin oyunu tribunadan izləyəcəyi gözlənilir. Bu komandaların ilk dövrədəki dueli məhsuldar və qalmaqallı alınmışdı. Adana təmsilçisi 3 top fərqi ilə geridə olsa da, Balotellinin inamlı oyunu sayəsində hesabı bərabərləşdirməyə müvəffəq olmuşdu. Sonradan meydana çıxaraq qol və məhsuldar ötürmə ilə yadda qalan ünlü futbolçu vurduğu qoldan sonra Sərgən Yalçına həmin o məhşur beyin işarəsini göstərərək gündəmi zəbt etmişdi. 31 yaşlı futbolçunun aktivində bu mövsüm 22 rəsmi oyunda 11 qol, 5 məhsuldar ötürmə var.