“Söymüşəmsə, niyə birbaşa qırmızı vərəqə verilmədi?” - AÇIQLAMA
Azərbaycan premyer-liqasında 15-ci turun oyunları keçirilir.
Tura dünən "ASK Arena"da start verilib. "Keşlə" doğma azarkeşləri önündə "Zirə"ni qəbul edib. Gərgin mübarizə şəraitində keçən görüşün qırılma anı 39-cu dəqiqədə baş verib. Meydan sahiblərinin kapitanı İlkin Qırtımov 4 dəqiqə ərzində iki sarı vərəqə alaraq meydandan qovulub.
Oyunun axarına təsir edən bu məqamla bağlı təcrübəli müdafiəçi ilə danışdıq. Qırtımov “Football-plus.az” saytına bunları söylədi: "Qırmızı vərəqə almağım rəqib üçün bir stimul idi. Həmin epizod oyununun qırılma anı oldu. İlk sarı vərəqə aldığım epizodda rəqib qolumdakı kapitan sarğısını çıxarırdı. Hakimə dedim ki, gözünün önündə edir bunu, niyə oyunu saxlamırsan? Deyir ki, söyüş söymüsən. Söymüşəmsə, niyə birbaşa qırmızı vərəqə verilmədi? İkinci epizod isə sarı vərəqəlik idi. Mən meydanda hakimə bəzi məsələlərdə kömək edirəmsə, məsələn, öz oyunçularımızı sakitləşdirirəmsə, o da mənə bir az güzəşt etməli idi".
GÜNAY VƏLİYEVA
