"Məmmədovun istintaqdan yayınması haqda səslənən iddialar əsassızdı"
Srağagün məşhur iş adamı, artıq tarixin yaddaşına köçmüş “Bakı”nın prezidenti Hafiz Məmmədovun Dövlət Vergi Xidmətinin Yasamal istintaq şöbəsində saxlanıldığı barədə məlumat yayılıb.
İqtisadiyyat Nazirliyi yanında Dövlət Vergi Xidmətinin Vergi Cinayətlərinin İbtidai Araşdırılması Baş İdarəsində Məmmədovun bilavasitə faktiki rəhbərliyi həyata keçirdiyi müəssisələr üzrə yaranmış, külli miqdarda vergi və məcburi dövlət sosial sığorta haqlarının ödəməkdən yayındırılması faktları üzrə cinayət işi başlanıb. Başlanmış cinayət işi çərçivəsində Hafiz bəy istintaqa gəlməkdən boyun qaçırdığından, onun barəsində ittiham elan edilməsi üçün şəxsin tutulması ilə bağlı axtarış haqda qərar qəbul edilib. Yasamal rayon Məhkəməsinin qərarı ilə Hafiz Məmmədov barəsində 2 ay 15 günlük həbs qətimkan tədbiri seçilib.
Dünən isə Bakı Apellyasiya Məhkəməsində Məmmədovun ev dustaqlığına buraxılması ilə bağlı vəsatətə baxılıb. Hakim Kamran Əkbərovun sədrliyi ilə keçirilən prosesdə Hafiz bəyin ev dustaqlığına buraxılması ilə bağlı vəsatəti təmin edilməyib. Məhkəmə bildirib ki, o, dövlətə olan 1 milyon manat borcunu tam ödəməlidi.
Məsələ ilə bağlı “qafqazinfo.az” saytına açıqlama verən Məmmədovun vəkili İsmayıl Kəngərli müvəkkilinin şirkətləri ilə bağlı hesablanmış sosial ödəniş borcunun 1 milyon 462 min manat olduğunu bildirib. Onun da 1 milyon manat hissəsi 2013-15-ci ilin birinci rübünə düşür. Vəkil onu da əlavə edib ki, qanunvericilikdə üzərindən 7 il keçmiş ödənişlərə görə cəzaya cəlb etməyə icazə verilmir. Yəni Cinayət Məcəlləsinə və Konstitusiya Məhkəməsinin qərarına əsasən istintaq orqanı bu məbləğlərə görə ittiham verə bilməz. Kəngərli Hafiz bəyin məhkəmədə ödəniş etməyə hazır olduğunu söylədiyini vurğulayıb: “Hafiz Məmmədov təklif edib ki, Vergi Xidmətinə ödədiyi əlavə 2 milyon manat DSMF-yə olan borcuna yönəldilsin. DSMF isə Vergi Xidmətləri ilə hesablarının ayrı olduğunu bildirərək həmin pulu çəkə bilmədiyini deyir. Vergi Xidməti hazırda bu məbləği Hafiz Məmmədova geri qaytara bilmədiyini, gələcəkdə yaranacaq vergi borcuna silinəcəyini qeyd edir”. Vəkil qeyd edib ki, bu günədək 400 min manat ödəniş edilib: “Ola bilsin, bu gün də əlavə ödəniş edilsin. Hafiz Məmmədovun mövqeyi belədi ki, hesablanan borcu ödəməyə hazırdı. Təklif edir ki, o, evə buraxılsın və tələb olunan məbləği toplayıb hissə-hissə ödəsin”.
Bu arada məsələ ilə bağlı ilginc məlumat almışıq. Məmmədova yaxın, ancaq adının çəkilməsini istəməyən şəxslərdən biri yaşananları belə izah etdi: “İlk növbədə onu qeyd edək ki, Hafiz Məmmədovun şirkətlərinin vergiyə görə heç bir borcu yoxdu. Problem Dövlət Sosial Müdafiə Fonduna olan ödənişlərə görədi. Borc 4 şirkətə görə yaranıb ki, həmin şirkətlərdən biri də bir müddətdi tarixin yaddaşına qovuşan “Bakı” klubudu. Sırf futbol klubunun sosial ödənişlərdən 500 min manata yaxın borcu qalıb. Onu da bildirim ki, Məmmədovun istintaqdan yayınması haqda səslənən iddialar əsassızdı. Çünki Məmmədov son dəfə dekabrda Vergilər Nazirliyinin İstintaq İdarəsində olub. Daha sonra isə dekabrın ortalarında koronavirusa yoluxub və buna görə 2 həftə ev şəraitində müalicə alıb. Məhz səhhətində yaranan problemlər səbəbindən o, son zamanlar məsələ ilə bağlı Vergilər Nazirliyinin İstintaq İdarəsinə yollana bilməyib. Mənbəmizin sözlərinə görə, ümumilikdə borc 1,4 milyon manat təşkil etsə də, hüquqi cəhətdən hazırda Məmmədovun ödəməli olduğu məbləğ 400 min manatdan artıq deyil və o sözügedən məbləği cümə axşamı dövlətin hesabına köçürüb. Məhz bu səbəbdən də dünən onun ən pis halda ev dustaqlığına buraxılacağı gözlənilirdi. Lakin bu baş vermədi. Üstəlik, dünən hakimlər Məmmədovun apellyasiya şikayətinə baxıblar. Qaldırılmış vəsatətə isə məhkəmə orqanları bazar ertəsi baxacaqlar. Həmin günə qədər məbləğ tam ödənilsə, Hafiz Məmmədov dərhal azadlığa burtaxılmalıdı”.
RƏŞAD "Futbol+" qəzeti üçün
