“Qran-pri”də iştirak etmək üçün Portuqaliyanın Almada şəhərinə yollanan cüdo yığmamızda koronavirusa kütləvi yoluxma aşkarlanıb.
“Football-plus.az” saytı "A Bola" nəşrinə istinadən xəbər verir ki, nümayəndə heyətinin 5 üzvündə infeksiya aşkarlanıb. Onların arasında məşqçi və idmançılar da var. 9 nəfərin isə peyvənd olunmadığı bildirilir.
Məsələ ilə bağlı Azərbaycan Cüdo Federasiyası məlumat yayıb:
“Kişi və qadınlardan ibarət milli komanda yanvar 26-da Portuqaliyanın Almada şəhərində 28-30-da keçiriləcək “Qran-pri” turnirində iştirak etmək üçün adıçəkilən şəhərə yola düşüb. Səfərdən öncə Beynəlxalq Cüdo Federasiyasının (BCF) müəyyən etdiyi protokola uyğun olaraq, vaksin edilmiş heyət üzvlərindən bir dəfə, vaksin olunmamış heyət üzvlərindən (nəfər) isə iki dəfə PCR testi götürülüb, müvafiq sənədlər BCF-nin elektron qeydiyyat sistemi üzərindən təşkilatçılara göndərilib və bütün müvafiq prosedurlar yerinə yetirildikdən sonra PCR test nəticələri neqativ çıxan heyət üzvləri Portuqaliyaya yollanıb. BCF-nin qaydalarına əsasən, iştirakçılar yarışın keçiriləcəyi yerə çatdıqdan sonra daha bir dəfə test verməlidilər. Azərbaycan yığmasının üzvləri dünən Almada şəhərinə çatdıqdan sonra onlardan bütün digər ölkələrdən olduğu kimi, yenidən PCR testi götürülüb. Təəssüf ki, Bakıda neqativ PCR nəticəsi olan bəzi heyət üzvlərində bu dəfə pozitiv nəticə açıqlanıb.
BCF-nin qaydalarına əsasən, pozitiv PCR nəticəsi olan heyət üzvləri yarışlara buraxılmır və ayrıca otaqlarda karantinə alınır. Qeyd edək ki, hazırda pozitiv PCR nəticəsi olan milli komanda üzvləri Portuqaliya dövlətinin qaydalarına əsasən 7 günlük karantinə alınıblar. Heyət üzvləri özlərini yaxşı hiss edirlər, sağlamlıqlarında ciddi problem yoxdu və daimi həkim nəzarəti altındadılar. Azərbaycan Cüdo Federasiyası onların müalicəsi üçün bütün lazımi tədbirləri həyata keçirir. Pozitiv PCR nəticələri tək Azərbaycanı təmsil edən idmançılarda yox, digər ölkələrin idmançılarında da aşkar edilib və onlar da yarışlardan kənarlaşdırılıb.
Millidə pozitiv PCR testi olan heyət üzvlərinin sayı 2 nəfərdən çox olduğundan ilk testdə neqativ PCR nəticəsi olan təmsilçilərimizdən yenidən PCR testi götürülüb. Həmin testlərin nəticəsinə əsasən, sabahdan başlayacaq yarışda hansı təmsilçilərimizin mübarizə aparacağı dəqiqləşəcək. Bu məlumat bəlli olduqdan sonra adıçəkilən yarışda Azərbaycanı təmsil edəcək heyət üzvləri barədə ayrıca məlumat veriləcək”.
