Aspilikueta “Çelsi”dən azad agent kimi gedəcək
Sesar Aspilikueta ilə bağlı suala cavab tapılıb. Təcrübəli futbolçu “Çelsi”də qalmayacaq.
O, klubla müddəti yayda başa çatacaq müqaviləsini yeniləmək istəməyib. Səbəb rəhbərliyin təklif etdiyi “1+1 il” sxeminin Aspilikuetanı qane etməməsi ilə bağlıdı. Futbolçu yeni anlaşmanın “2+1 il” sxemi əsasında reallaşmasını istəyirdi. 32 yaşlı ispaniyalı müdafiəçi karyerasını vətənində davam etdirəcək. “El Chiringuito TV”nin yaydığı xəbərə görə, Sesar mövsümün sonunda azad agent kimi “Barselona”ya keçəcək. Tərəflər “3+1 il” sxemi üzrə müqavilə imzalayacaqlar.
Aspilikueta “Çelsi”nin formasını 2012-ci ildən daşıyır. Ötən müddətdə bu komanda ilə iki dəfə ölkə çempionu olub, İngiltərə kubokunu və Liqa kubokunu qazanıb. Onun londonlularla beynəlxalq arenada Çempionlar Liqası, Avropa Liqası və UEFA Suerkubokunun qalibi olduğunu xüsusi vurğulayaq. İspaniyalı futbolçu bu mövsüm bütün turnirlərdə iştirak etdiyi 27 oyunda 3 məhsuldar ötürmə edib.
Yeri gəlmişkən, “Çelsi” heyətinə yeni oyunçu cəlb edib. London klubu “Derbi Kaunti”dən Dilan Uilyamsı sıralarına qatıb. Bu klubun yetirməsi olan 18 yaşlı müdafiəçi ötən yay əsas komandaya cəlb olunub. İstedadlı futbolçu öz “instaqram” hesabında keçidi ilə bağlı bu cümlələri yazıb:
“Dünyanın ən böyük klublarından biri ilə müqavilə bağladğım üçün özümü xoşbəxt sayıram. “Derbi Kaunti”nin əməkdaşları və oyunçularına mənim üçün etdiklərinə görə minnətdaram”.
