Kamerunda təşkil olunan Afrika Millətlər Kubokunda (AMK) 1/8 finalın həyəcanı davam edir.
Yanvarın 24-25-də keçirilən oyunlardan sonra bu mərhələnin daha 4 qalibi məlum oldu. Qambiya, Kamerun, Seneqal və Mərakeş yığmaları daha əvvəl 1/4 finala vəsiqə qazanan Burkina Faso ilə Tunisin sırasına qoşuldu.
1/8 final
Qvineya – Qambiya 0:1
Musa Barrou, 71.
Qvineya: A.Keyta, M.Kamara, Konte II, Sou, Konate (Gilavoqi, 83), Moriba, A.Diavara, A.Kamara (M.Silla, 76), İ.Sisse, X.Kante, M.Bayo (Kaba, 83).
Qambiya: Qaye, Turey, O.Kolli, Qomes, Nqum, Bobb (Mbay, 90+1), Marre, Darbo (Sisey, 72), A.Callou (E.Kolli, 63), Mudu Barrou (Ncie, 72), Musa Barrou.
Qrup mərhələsində ümumilikdə 5 qol vuran Qvineya və Qambiya arasındakı matç da AMK-nın əksər oyunları kimi məhsuldar və baxımlı alınmadı. Müntəzəm olaraq qitə çempionatının pley-offunda oynayan Qvineya yığması cütün favoriti sayılırdı. Lakin turnirin debütantı olan Qambiya oyun ərzində təşkil etdiyi azsaylı hücumlardan birini qola çevirdi. Musa Barrounun 71-ci dəqiqədə vurduğu qol rəqibi daha da fəallaşmağa vadar etdi. Son dəqiqələrdə qapı çatı iki dəfə qambiyalıların dadına çatdı. Onlar hamını təəccübləndirməyə davam edirlər.
Kamerun – Komor adaları 2:1
Toko Ekambi, 29. Abubakar, 70 - M’Şanqama, 81.
Kamerun: A.Onana, Fay, Kastelletto, Nqadyo-Nqacui, Tolo, Nqamalyo (Bassoqoq, 63), Zambo Angissa (J.Onana, 84), Honqla, Toko Ekambi (Lea Siliki, 77), Çupo-Motinq (N’Ji, 63), Abubakar (Boaken, 77).
Komor adaları: Əl-Hadur, Bakari (M’Madi, 88), Abdu, M.Yussuf (İ.Yussuf, 89), Zahari, Başiru (Mussa, 89), R.Abdulla, B.Yussuf (Mattoyr, 75), M’Şanqama, Monyi (Əli Məhəmməd, 52), Ben Nabuhan.
Qambiyanın növbəti mərhələdəki rəqibi, gözlənildiyi kimi, Kamerun oldu. Təşkilatçı ölkənin komandasının Komor adaları ilə oyundakı üstünlüyü bir qədər də artmışdı. Belə ki, hələ matç ərəfəsində adalıların qapıçısız qaldıqları məlum idi. Əsas qapıçı Ben Buana zədə almış, onun əvəzləyiciləri Ahamada ilə Husseyni isə koronavirusa yoluxmuşdular. AMK-nın reqlamentinə görə, bu halda qapını sahə oyunçusu qorumalı idi. Bu çətin missiyanı Əl-Hadur üzərinə götürmüşdü. Maraq üçün “Ayaçço”nun sol cinah müdafiəçisinin 172 santimetr boya malik olduğunu və Komor adalarının daha 6 sahə oyunçusunun məlum səbəbdən karantinə alındığını qeyd edək.
Kamerun heyətlə bağlı böyük problemlərinə baxmayaraq, turnirin debütantını çətinliklə məğlub etdi. İtkilər azmış kimi, artıq 7-ci dəqiqədə hakim Bamlak Tessema VAR-ın köməyi ilə adalıların kapitanına birbaşa qırmızı vərəqə göstərdi: Abdu kamerunlu Nqamalyoya qarşı kobud fola əl atdığı üçün komandasını meydanda azlıqda qoydu. Bundan sonra çoxları üçün ev sahiblərinin vuracağı qolların sayı maraq doğura bilərdi. Lakin turnirin debütantı güclü rəqibinə bacardığı qədər müqavimət göstərdi və fasiləyə qədər qapısından yalnız bir top buraxdı.
Amma ikinci hissənin əvvəli autsayder sayılan komanda üçün çətin keçdi. Əl-Hadur rəqibin ardıcıl üç zərbəsini zərərsizləşdirdi. “Çərçivə”dəki bacarığını nümayiş etdirən Şakeri bir də 70-ci dəqiqədə Abubakar məyus etdi. “Beşiktaş”ın sabiq hücumçusu 6-cı qolunu vurmaqla turnirin ən yaxşı bombardiri statusunu qorudu. Ancaq onun qolu matçda sonuncu olmadı. M’Şanqama özünün qazandığı cərimə zərbəsini mükəmməl yerinə yetirərək Komor adalarını ümidləndirdi. Növbəti qola gücü çatmayan debütant Kameruna 1:2 hesabıyla uduzaraq turnirdə özü ilə bağlı xoş təəssürat formalaşdırdı. Ev sahibləri isə oyun keyfiyyətləri isə böyük suallar doğurdular.
Seneqal – Kabo Verde 2:0
Sadio Mane, 63. Dyenq, 90+2.
Seneqal: E.Mendi, Siss (Ballo-Ture, 82/ Mbaye, 90+5), B.Sarr, A.Diallo, K.Kulibali, Quye (Lopi, 82), Quey, N.Mendi, Dia, Dyedyu, Sadio Mane (Dyenq, 70).
Kabo Verde: Vozinya, Steven Forteş, Stopira, Lopeş (D.Borqes, 46), Roşa Santuş (Julio Tavareş, 75), Ceffri Forteş, Andrade, Dilan Tavareş (N.Borqes, 69), Monteyro, Mendeş (Semedu, 75), Rodrigeş.
Cütün favoriti sayılan Seneqal yığması uzun müddət Kabo Verdenin qapısına yol tapmaqda böyük problemlər yaşadı. Rəqib ilk dəqiqələrdən inamlı müdafiəsi ilə diqqət çəkirdi. Doğrudu, artıq start fiti səslənəndən bir neçə saniyə sonra Sadio Manenin zərbəsinin qarşısını, belə desək, dirək aldı. Ümumiyyətlə, “Liverpul”un hücumçusu meydanda olduğu 70 dəqiqə ərzində olduqca fəal görünərkən, oyundaşları sönük təsir bağışladılar. Seneqallıların hücumdakı problemləri yalnız rəqib meydanda 9 nəfərlə qalandan sonra aradan qalxdı. 21-ci dəqiqədə “Qarabağ”ın yarımmüdafiəçisi Andrade rəqibə qarşı kobud oyununa görə qarşısında birbaşa qırmızı vərəqə gördü. Amma onun qovulması heç də Seneqalın dərhal fəallaşması ilə müşayiət olunmadı.
Fasilədən sonra – 54-cü dəqiqədə Mane ilə Vozinyanın cərimə meydançasının xətti üzərində toqquşması hər iki oyunçunun xəsarət alması ilə nəticələndi. Sadio hətta bir neçə saniyəlik huşunu itirdi, Vozinya isə ayaqüstə normal dayana bilmirdi. Hakim Lalu Benbraham VAR-ın köməyi ilə Kabo Verdenin qapıçısına da qırmızı vərəqə göstərdi. Bundan sonra üstünlüyü tamamilə ələ alan Aliu Sissenin komandası Sanenin zərbəsi ilə hesabı açdı. Amma Sadio özünü yaxşı hiss etmədiyi üçün əvəzləndi. Son dəqiqələrdə Dyenqin vurduğu qol seneqallıların 1/4 finalda oynayacağına şübhə yeri qoymadı.
Mərakeş – Malavi 2:1
Ən-Nəsiri, 45+2. Hakimi, 70 - Mhanqo, 7.
Mərakeş: Bunu, Hakimi, Sayss, Agerd, Masina, Luza (Barkok, 80), Amallah, Amrabat, Bufal (Əl-Həddadi, 81), Ən-Nəsiri (Abuxlyal, 88), Əl-Kaabi (Mmae, 53).
Malavi: Tomu, Sanudi (Deyvi, 79), Çaziya, Çembezi, Çirva, Mhone (Firi, 45+4), C.Banda, İdana (Nqalande, 80), Madinqa (Fodya, 78), Muyaba (Mbulu, 46), Mhanqo.
Malavi yığması pley-offa çıxmaqla turnirin sürprizlərindən birini reallaşdırmışdı. Bu komandanın güclü Mərakeşə qarşı şansı təbii ki, açağı dəyərləndirilirdi. Sensasiya baş vermədi. Hərçənd ilk hissənin gedişi bunu düşünməyə əsas verirdi. Çünki hesabı malavililər açdılar: Mhanqonun vurduğu qol həm erkən, həm də baxımlı alındı. Ancaq Malavinin sürprizi yalnız bundan ibarət oldu. Çünki Mərakeş millisi çox keçmədən üstünlüyü tamamilə ələ alaraq rəqibi qapısına sıxışdırdı. Hesabın yalnız fasilə ərəfəsində bərabərləşməsinə mərakeşlilərin şansları boşa verməsi və qapıçı Tomunun seyvləri səbəb oldu. İkinci yarıda rəqibin yorğunluğundan yararlanan Vahid Həlilhociçin komandası Hakiminin cərimə zərbəsi ilə vurduğu qolla növbəti mərhələyə adladı.