İnamla tarixinin 7-ci çempionluğuna doğru irəliləyən ''Trabzonspor'' bu transfer dönəmini fəal keçirməkdə davam edir.

Superliqanın lideri heyətini hücumçu ilə gücləndirib. Trabzon təmsilçisi son illərdə Türkiyə futbolunun başlıca oyunçu yetişdirmə fabrikasına çevrilən ''Altınordu''dan Enis Destanı heyətinə qatıb. Gənc forvard trabzunlulara 600 min avroya başa gəlib. 19 yaşlı futbolçu ilə 4,5 illik müqavilə imzalanıb. Gələn mövsüm üçün onun illik məvacibi 2 milyon 750 min lirə olacaq və bu məbləğ hər il 250 min lirə artacaq.

''Altınordu''nun öz yetirməsi olan istedadlı hücumçu ötən mövsüm 30 rəsmi oyuna 14 qol vurmaqla diqqət çəkmişdi. Enis Destan qış transfer dönəmində ''Trabzonspor''un Jan Kuassi, Timoti Puxaç, Yusuf Ərdoğan və Edin Visçadan sonra heyətinə qatdığı 5-ci futbolçudu.