"Sumqayıt" Antalyada son yoxlama oyununu keçirib.
"Kimyaçılar" Şimali Makedoniyanın "Şkupi" klubu ilə qarşılaşıb. Aleksey Baqa aşağıdakı heyətə güvənib:
Aydın Bayramov, Tellur Mütəllimov, Camaləddin Xocaniyazov, Dmitri Nağıyev, Vüqar Mustafayev, Murad Xaçayev, Elşən Abdullayev, Rəhim Sadıxov, Rüfət Abdullazadə, Xəzər Mahmudov.
Qarşılaşma şimali makedoniyalıların üstünlüyü ilə başladı. Rəqib ilk hissədə bütün komponentlərdə "Sumqayıt"ı üstələyirdi. Baqanın komandası yenə cinahlardan ötürmələrlə qol vurmaq niyyətində idi. Lakin bu plan alınmırdı. Belaruslu məşqçi Xaçayevin "açar" ötürmələrinə güvənirdi. Lakin hücum xəttində Xəzər Mahmudovun "dişsizliyi" hiss olunurdu. Matçın 27-ci dəqiqəsində hesab açıldı. "Şkupi"nin futbolçuları "Sumqayıt"ın müdafiəsindəki çaşqınlıqdan istifadə edib, qol vurdu. Fasiləyə kimi "kimyaçılar" toparlanmağa çalışsa da, rəqib buna imkan vermədi.
Baqa ikinci hissəyə də eyni heyətlə çıxdı. Hiss olunurdu ki, belaruslu "Qəbələ" ilə matçda meydanda olan komandanı yoxlayır. Maraq üçün qeyd edək ki, Rüfət Abdullazadə oyun ərzində diqqət çəkirdi. Onun fəallığı, görüşü izləyənlərin də marağına səbəb oldu... 62-ci dəqiqədə Dmitrinin sağ cinahdan ötürməsi qapıçıya deyərək tora daxil oldu. Sumqayıtlıların sevinci uzun çəkmədi. "Şkupi" 7 dəqiqə sonra hesabı xeyrinə dəyişdi. Bundan sonra Baqa əlində olan bütün futbolçuları meydana buraxdı. Lakin hesab dəyişmədi.
Bununla da “Sumqayıt” Antalya toplanışını qələbəsiz yekunlaşdırdı. Premyer-liqanın bürünc mükafatçısı hazırlıq çərçivəsində buna qədər “Yagelloniya” (Polşa) ilə qolsuz bərabərə qalıb, “Berliner”ə (Almaniya) 2:5 hesabı ilə məğlub olub. Aleksey Baqa isə ilk qalibiyyət sevincini yaşamaq üçün fevralda bərpa olunacaq ölkə kuboku və ya premyer-liqanı gözləməli olacaq.
Sonda maraq üçün qeyd edək ki, qarşılaşmanı izləyənlər arasında "Qəbələ"nin prezidenti Fariz Nəcəfov, "Sabah"ın prezidenti Maksud Adıgözəlov, Müşahidə Şurasının üzvü İqor Ponamaryov da var idi. Millimizin məşqçiləri Benito Karbone və Arif Əsədov da tribunada idi.
Bu arada "Sumqayıt"da baxışda olan Rza Aliyari bəyənilməyib. Aleksey Baqa onu sərəncamında görmək istəməyib. Emin Safixanov haqda qərar isə yaxın günlərdə veriləcək.
Qeyd edək ki, "Sumqayıt" sabah səhər saatlarında vətənə dönəcək.
İLKİN SULTANLI, Antalya
