Xəbər verdiyimiz kimi, Nazim Məmmədzadə Şimali Makedoniya klubu “Boreç”də baxışdadı.

Dünən “Qəbələ” adıçəkilən komandanı yoxlama matçında 1:0 hesabı ilə məğlub etdi. Oyun qarşılıqlı razılıq əsasında 70 dəqiqə çəkdi. Azərbaycanlı müdafiəçi “Boreç”in heyətində mübarizə apardı. Özünü yaxşı tərəfdən göstərən Nazimin oyununu millinin məşqçisi Arif Əsədov, həmçinin U-19-un baş məşqçisi Samir Əliyev də bəyəndi.

Qarşılaşmadan dərhal sonra müdafiəçi ilə danışdıq.

- “Qəbələ”yə 0:1 hesabı ilə məğlub olduz. Oyun haqda nə deyə bilərsən?

- Çox çətin oyun oldu. Bizim heyətdə 6-7 futbolçu yox idi. Onların hamısı koronavirusa yoluxduqları üçün karantindədilər. Məşqçilər heyətindən də bir neçə nəfər bu xəstəlikdən əziyyət çəkir. Bu səbəbdən də qarşılaşma bizim üçün çətin keçdi. Amma uduzsaq da, yaxşı oynadığımızı düşünürəm.

- Son klubun “Neftçi-2” olub. Mahmud Qurbanovun rəhbərliyi altında ötən mövsüm çempion olan komandada çıxış edirdin. Necə oldu ki, Şimali Makedoniya klubuna baxışa çağrıldın?

- Müqaviləmin müddəti başa çatdı. Mahmud Qurbanovla danışdım. Ona dedim ki, təkliflər var. Sonra menecerimlə danışdım. “Boreç”in məni istədiyini söylədi. Əvvəlcədən bildirdi ki, baxışda olacam. Mən də özümə güvənib, bura gəldim.

- Bu klubda qalmaq ehtimalın nə qədərdi? Bu gün səni oyunçu çatışmazlığına görə oynatdılar?

- Bu suala dəqiq cavab verə bilmərəm. Üçüncü oyunumuzu keçirirdik. Bu görüşlərin hamısında meydana çıxmışam. Birinci matçda 20 dəqiqə meydanda oldum. Sonrakı qarşılaşmada baş məşqçi 60 dəqiqə şans verdi. Bu gün isə, özünüz də gördüz, əvəzlənmədən oynadım. İnşallah, yaxşı olar. Amma hər şey baş məşqçinin qərarından asılıdı.

- Bəyəniləcəyin təqdirdə müqavilənin şərtləri necə olacaq?

- Böyük ehtimalla 1 illik müqavilə bağlayacağıq. Bu komanda əsas liqanı tərk etsə, müqavilə avtomatik ləğv olunacaq.


Maraq üçün qeyd edək ki, Nazim baş məşqçi Jane Nikoliski tərəfindən bəyənilib. Futbolçu komanda ilə birgə Şimali Makedoniyaya aparılacaq. Onunla 1,5 illik müqavilə bağlanacaq.

İLKİN SULTANLI, Antalya