“Barselona”nın zədəli futbolçusu Ansu Fatinin durumuna aydınlıq gəlib.
19 yaşlı hücumçu ötən gün tibbi müayinədən keçib. Lakin həkimlər hələlik onun əməliyat olunub-olunmayacağına qərar verməyiblər. Fati əməliyyat olunarsa, təxminən 3-4 ay yaşıl meydanlardan uzaq qalacaq. Rəhbərlik İspaniya kubokunun “Atletik”lə oyununda (2:3) sol ayağından zədə alan futbolçunun cərrahi müdaxiləsinin zəruri olduğunu düşünür. Məşqçilər də bunu vacib sayır. Bu halda istedadlı oyunçu ona uzun müddət əziyyət verən omba bisepsindəki problemdən birdəfəlik qurtula bilər.
Ansunun aqibətini ailəsi müəyyən edəcək. Hər halda rəhbərlik onun valideynlərinin əməliyyatla bağlı fikrini nəzərə almağı lazım bilir. Qeyd edək ki, Fati bu mövsüm bütün turnirlərdə 10 oyunda meydana çıxıb, 5 qol vurub və 1 qolun ötürməsini verib.