Elmas Terimi qovması haqda danışdı
''Qalatasaray''da rəhbərliyə etiraz günü gündən artır.
Baxmayaraq ki, başqan Burak Elmas bu vəzifəyə yayda gəlib və prezidentlik dönəminin cəmi 7-ci ayındadı. Yayda gənc oyunçulara 26 milyon avro xərcləyib Fatih Terim ilə birlikdə ''klubun gələcəyini qururuq'' sözləri ilə yola çıxan Elmas nəticələr pisləşən kimi Terimi qovdu. Onun yerinə gətirilən Domenek Torrentin isə Türkiyə futbolunu və komandanı tanımaması üzündən vəziyyət daha da acınacaqlı duruma gəlib. Düşmə zonasından cəmi 4 xal öndə olan ''Qalatasaray''ı sabah lider ''Trabzonspor''la oyun gözləyir. Türkiyə mətbuatının yazdığına inansaq, komanda bu matçda da məğlub olacağı təqdirdə camiə Burak Elmasdan növbədənkənar seçkilərə gedilməsini tələb edəcək. Bundan başqa martdakı maliyyə toplantısında Elmas dönəminin klub rəsmiləri tərəfindən qənaətbəxş sayılmama ehtimalı yaranıb. Bu baş verəcəyi təqdirdə prezident məcburən növbədənkənar seçkilərə getməli olacaq.
Dünən ''tvitter''də maraqlı bir hadisə yaşandı. Prezidentin istefasını tələb edən bir qrup fanat canlı yayında bir söhbət otağı açdılar. Gözlənilmədən həmin otağa Burak Elmas özü də daxil oldu! #BirlikteGöndereceğiz heşteqi ilə açılan otağa daxil olan Elmas bir müddət sonra ordan çıxdı. Belə güman olunur ki, o yanlışlıqla həmin yayına qoşulubmuş.
Bu arada Elmas Türkiyə mətbuatına Fatih Terimi qovması ilə bağlı diqqətçəkən açıqlamalar verərək bunları deyib:
''Belə bir olayın yaşanması məni çox üzdü. Çünki Fatih hocanı həm bir insan, həm də ''Qalatasaray''ın əfsanəsi kimi çox sevirəm. Ona istefa xəbərini verdiyim 10 dəqiqəlik dönəmdə həyatımın ən çətin anlarını yaşadım. Duygularım ve ağlımın arasında ilişib qalmışdım. Dilim bir cür, duyğularım başqa cür danışırdı. Amma nəticələrimiz çox pis idi. Avropada çox uğurlu dönəm keçirsək də, superliqada və kubokda işlər qaydasında getmədi. Bu üzdən bizə və tədricən Fatih hocaya da tənqidlər gəlməyə başladı''.
