Antalyada təlim-məşq toplanışında olan “Qarabağ” dünən növbəti yoxlama görüşlərini keçirdi.

Ağdamlılar eyni gündə iki sınaq matçına çıxdı.
Baş məşqçi Qurban Qurbanov əvvəlcə “Baçka Topola” ilə görüşdə futbolçularının hazırlıq durumunu yoxladı. Serbiya klubu ilə qarşılaşmada əsasən gənclərə üstünlük verildi. Təcrübəli mütəxəssis Bakı vaxtı ilə 13.30-da başlayan matçda bu futbolçulara güvəndi: 89. Amin Ramazanov, 13. Bəhlul Mustafazadə, 4. Rahil Məmmədov, 29. Marko Veşoviç, 44. Elvin Cəfərquliyev, 83. Nihad Quliyev, 7. Riçard Almeyda, 15. Leandro Andrade, 77. Ramil Şeydayev, 97. Rüstəm Əhmədzadə, 22. Musa Qurbanlı.

Qurban Qurbanovun ilk oyuna daha az şans qazanan futbolçularla çıxacağı bəlli idi. Çünki Serbiya təmsilçisi Ağdam klubunun əsas heyəti ilə oynayacaq potensialda deyildi. Rəqib məhz gənclərin gücünə uyğun olaraq seçilmişdi. Qurban bəy bu qarşılaşmada bir sıra rotasiyalar etdi. “Qarabağ”ın əvvəlki oyunlarında Zubirin yerində sol cinahda Ramil Şeydayevin çıxış etdiyini görmüşdük. Bu dəfə təcrübəli mütəxəssis Rüstəm Əhmədzadəni sağ vinger kimi oynadırdı. Gənc hücumçu burda özünü yaxşı tərəfdən göstərə bildi. Fiziki gücünün yerində olması, sürətli oynamaq bacarığı Rüstəmə burda problem yaratmadı. Qurban Qurbanovun azərbaycanlı hücumçulardan ibarət sistemi yaxşı təsir bağışladı desək, yanılmarıq. Oyun rəqibin 1:0 hesablı qələbəsi ilə başa çatsa da, Ramil, Musa və Rüstəm serblərə çətin anlar yaşatdı. Əsasən də baş məşqçinin oğlu istəkliydi. Onun aqressivliyi komanda yoldaşlarının da daha yaxşı oynamasına səbəb olurdu.

İlk yarıda hər iki tərəfin cəhdlərinə baxmayaraq, hesab açılmadı. Fasilədən sonra Qurban Qurbanov Marko Veşoviç, Riçard Almeyda və Rahil Məmmədovun əvəzinə meydana ardıcıllıqla Abbas Hüseynov, İsmayıl İbrahimli və Zamiq Əliyevi buraxdı. Yeganə qol 62-ci dəqiqədə vuruldu. Qolkiper Amin topu uzaqlaşdırmaq istəyən zaman kobud səhvə yol verdi. Top rəqibə dəyərək qapıya daxil oldu. Qoldan sonra “Qarabağ”ın cəhdlərinə baxmayaraq, hesab dəyişmədi. Görüşün ən maraqlı məqamlarından biri matçın sonlarına yaxın Nihad Quliyevin əvəzinə meydana 15 yaşlı müdadiəçi Musa Məmmədovun çıxması idi. Qurban bəy ona şans verməklə özünəinam hissi yaratmağa çalışdı.

Beləliklə, oyun “Baçka Topola”nın 1:0 hesablı qələbəsi ilə başa çatdı.
Axşam saatlarında isə “Qarabağ”ın əsas heyəti meydana çıxdı. Budəfəki rəqib Polşa təmsilçisi “Şlensk” oldu. Qurban Qurbanov görüşdə aşağıdakı futbolçulara güvəndi: 23. Luka Quqeşaşvili, 29. Marko Veşoviç, 5. Maksim Medvedev, 81. Kevin Medina, 27. Toral Bayramov, 2. Qara Qarayev, 18. İsmayıl İbrahimli, 19. Filip Ozobiç, 20. Kadi Borges, 10. Abdullah Zubir, 25. İbrahima Vaci.

Oyun çox sürətli və baxımlı alındı. Düzdü, “Qarabağ”ın bir neçə futbolçusu bu dəfə zəif çıxış etdi. Qolların, demək olar ki, hamısında yeni qolkiperin səhvi var idi. O, hələ tam qüvvə ilə çıxış edə bilmir. Ağdamlıların heyətində 4 hücumçu olsa da, bu mövqedə hələ də sıxıntı yaşayırlar. Seneqallı forvard İbrahima Vaci sözün əsl mənasında əlinə düşən fürsətləri boşa xərcləyir. Çox güman, Qurbanov digər görüşlərdə Ramil Şeydayevi və ya Rüstəm Əhmədzadəni əsas hücumçu kimi sınayacaq. Ümumiyyətlə, təcrübəli mütəxəssis dünən axşam saatlarında baş tutan qarşılaşmada bir çox rotasiya etdi. Ən diqqətçəkən məqam Kadi Borgesin dayaq yarımmüdafiəçi kimi çıxış etməsi idi. Düzdü, futbolçu əvvəlki komandalarında bu mövqedə oynayıb. Amma “Qarabağ” karyerasında ilk dəfə dayaq yarımmüdafiəçisi kimi oynayırdı. Daha bir maraqlı məqam yeni transfer, 2-ci hissədə meydana çıxan Leandro Andradenin sağ cinah yarımmüdafiəçisi mövqeyinə yer alması idi. Qurbanov burda yüksək performans göstərə biləcək oyunçu axtarışındadı. Yəni Xayme Romeronu unutdura biləcək futbolçuua ehtiyac duyur.

Ağdam təmsilçisinin heyətində ən yaxşı təsir bağışlayan futbolçu həmişəki kimi Abdullan Zubir idi. Fransalı rəqib müdafiəçilərinin başına oyun açsa da, bu da komandasına fayda vermədi. Oyun “Şlensk”in xeyrinə başa çatdı – 3:2. “Köhlən atlar”ın heyətində qolları 26-cı dəqiqədə Marko Veşoviç və 80-ci dəqiqədə Kadi Borges vurdu.
“Qarabağ” dünən keçirdiyi iki oyunun heç birində qalib gəlmədi. Antalyada buna qədər “Qaz Metan”la (Rumıniya) qolsuz bərabərə qalan ağdamlılar yanvarın 25-də daha iki matça çıxacaq. “Köhlən atlar” həmin gün əvvəlcə “Tatran”ı (Slovakiya), ardından Krakov “Visla”sını sınağa çəkəcək.
Maraq üçün qeyd edək ki, dünən qarşılaşmanı izləyənlər arasında PFL-in prezidenti Ramin Musayev də var idi. Futbol funksioneri matçdan sonra Qurban Qurbanovla ayaqüstü söhbətləşdi. Onlar bəzi məsələləri öz aralarında danışdıqdan sonra təcrübəli mütəxəssis Antalyada olan jurnalistlərin suallarını cavabladı.

- Bir gündə keçirdiyiniz iki oyunda fərqli heyətlərə güvəndiz.
- Demək olar ki, hər iki oyundan razı qaldım. Futbolçularda yüklənmələr olmuşdu. Toplanışın yüklənmələrin əsas götürülən hissəsini başa vurduq. Bunu yaxşı oyunla tamamlamaq istəyirdik. Yaxşı rəqiblərə qarşı mübarizə apardıq. Qarşılaşdığımız komandalar fiziki cəhətdən bizdən daha hazırlıqlı idi. Bu iki matçda əksər futbolçularımız 90 dəqiqə meydanda oldu. Xoşuma gələn futbolçuların dinamik futbol sərgiləməsi oldu. Temp yetərincə yüksək alındı və oyunçular belə yükləmələrdən sonra bu dinamikaya dözdülər. Matçlardan sonra ayrı-ayrı futbolçuların göstəricilərinə baxdıq. Yaxşı nəticələrlə qarşılaşdıq. Qarşıdakı iki gündə istirahət edəcəklər. Ardından bərpa məşqlərimiz olacaq. Son yoxlama görüşlərində daha xoş təsir bağışlayacaqlarına inanıram.

- Komandanın Antalyadakı təlim-məşq toplanışını necə dəyərləndirərdiz?
- Oyunların son 15 dəqiqəsində müəyyən yorğunluq sezilirdi. Amma əsas odu ki, istədikləri vaxt sürəti artıra bilirdilər. Sürətə və gücə hesablanmış çalışmalardan sonra belə olması tam normaldır. Hər şey plan üzrə gedir.

- Yeni transferlər barədə nə deyə bilərsiz? Hazırlıqları sizi qane etdi?
- Komandaya bir qədər gec qoşulduqları üçün başqaları qədər hazır deyillər. Optimal formalarına təbii, ki, gec düşəcəklər. İstəkli olmaları isə ürəyimcədi.

- Bugünkü sınaq görüşlərində gənc futbolçulara da şans verdiz. Onları çempionat oyunlarında görə biləcəyikmi?
- Mütləq. Birinci və ikinci oyunda meydana çıxan heyətlər fərqli olsalar da, bu, əsas və əvəzedici komanda anlamına gəlməməlidi. Kim daha hazırlıqlı və istəkli olsa, forma şansı qazanacaq.

- “Baçka Topola” ilə oyunda Rüstəm Əhmədzadəni sağ cinah vingeri kimi oynatdız. Bu, Xayme Romeronun yoxluğunda ona həmin mövqedə güvənəcəyiniz anlamına gəlir? Yoxsa adi rotasiya idi?
- Rüstəm Ukraynada da daha çox sağ cinahda çıxış edib. Mən sol ayağından yaxşı istifadə edən futbolçuların sağda oynamasını xoşlayıram. Təbii ki, hansı rəqibə qarşı mübarizə aparmaq da şərtdi. Bəzən fərqli seçimlər edirik. Rüstəm sürətli futbolçudu. Səhərki matçda iki epizodda diqqət mərkəzinə düşdü. Ona həm nominal hücumçu mövqeyində, həm də sağda şans verməyi planlaşdırırıq. Çox yüksək potensialı var. İnkişaf etməsi üçün müxtəlif mövqelərdə sınayacağıq.

İLKİN SULTANLI, Antalya