"Qəbələ" - "Boreç" görüşündən sonra “Qəbələ”nin baş məşqçisi Elmar Baxşıyevlə söhbətləşdik.

Gənc mütəxəssis həm oyunu, həm də komandanın hazırlıq durumunu dəyərləndirdi.

- “Qəbələ” Antalyadakı təlim-məşq toplanışında ilk qələbəsini qazandı. Oyun haqda fikirlərinizi bilmək maraqlı olardı...

- Hər şey planlaşdırdığımız kimi gedir. Özümüz 3 gündən bir oyun salmışıq. Komanda burdakı yükləməni götürməliydi. Planımız bu idi ki, bütün futbolçular nəzərdə tutulan oyun müddətini doldursunlar. Düşünürəm ki, getdikcə daha da yaxşı olacağıq. Xətlərarası ələqə ideal formaya düşəcək. İlk oyunla bu qarşılaşma arasında fərqi də hiss etdik. Gündən-günə daha artığını edib, formaya düşməyə çalışacağıq.

- Antalya toplanışının bitməsinə üç gün qalıb. Komanda istədiyiniz formanı yığa biləcək?
- Əlbəttə! Ümumi götürsək, komanda 10 gündü bir yerdədi. Bu həqiqətən də çox az müddətdi. Düşünürəm ki, ikinci yarının ilk turlarında komanda 80-90 faiz optimal gücə yaxın olacaq.

- “Qələbə” rəhbərliyi qərar verib ki, qış fasiləsində başqa transfer edilməsin. Bu məqam sizə problem yaratmayacaq?
- Əlbəttə, təsiri olacaq. İstərdim ki, əlimdəki heyət geniş olsun. Amma hər şeyi istədiyimiz kimi olmur. Büdcəni də nəzərə almalıyıq. Düşünürəm ki, bizi ağır oyunlar gözləyir. Buna baxmayaraq, kollektiv sağlamdı. Komandamın üzvləri çatışmazlıqları dolduracaq, həll edəcək gücdədi.

- Klub rəhbərliyi bildirir ki, komandanın qarşısına konkret hədəf qoyulmayıb. Baş məşqçi kimi çempionatın ikinci yarısında nə üçün mübarizə aparacağınızı düşünürsüz?

- Əsasən futbolçularımdan tələb etdiklərimi görmək istəyirəm. Nəticə bir o qədər də önəmli deyil. Təki futbolçuların oyuna yanaşması düzgün olsun. Məni bütün oyunçuların qarşılaşmalarda, məşqlərdə istəklə çalışması sevindirir.

- Bu mövsüm üçün konkret hədəfiniz nədi?

- Nəyisə özümüzə hədəf seçməmişik. Qarşıda bizi kubok oyunu gözləyir. Həmin matça maksimum hazır olmaq haqda düşünürük.

İLKİN SULTANLI, Antalya