Mövsümün ikinci yarısına hazırlığı Türkiyədə davam etdirən “Qəbələ” dünən ikinci yoxlama oyununu keçirdi.

“Qırmızı-qaralar” Şimali Makedoniya “Boreç”iylə üz-üzə gəldi. Elmar Baxşıyev start heyətində bu “11-liy”ə şans verdi: Kristof Atanqana, Ruan Renato, Kamal Mirzəyev, Məqsəd İsayev, Emil Səfərov, Ehtiram Şahverdiyev, İsnik Alimi, Fernan Lopes, Omar Hani, Rövlan Muradov, Ülvi İsgəndərov.

Oyun, demək olar ki, “Qəbələ”nin tam üstünlüyü şəraitində keçdi. “Qırmızı-qaralar” ənənəvi sistemdən istifadə edirdi. Hücumlar əsasən cinahlardan qurulurdu. Omarla Rövlanın fəallığı xüsusi hiss olunurdu. Ötən oyunda olduğu kimi, bu dəfə də “Qəbələ”nin müdafiəsində Alimi çıxış edirdi. Məqsədin sağalması Baxşıyevi sevindirən məqamlardan idi. Belə ki, müdafiəçinin qayıdışından sonra sağ cinahda problem yaşanmırdı... Bölgə təmsilçisi ilk hissədə oyunun taleyini həll etdi. Hər hissəsi 35 dəqiqədən ibarət olan qarşılaşmanın 11-ci dəqiqəsində Fernan reyd edərək Omara ötürmə etdi. İordaniyalı yarımmüdafiəçi isə topu boş qapıdan keçirməkdə çətinlik çəkmədi. İkinci hissədə hər iki komandanın heyətində oyunçu dəyişiklikləri olsa da, hesab dəyişmədi. Bu, “Qəbələ”nin Antalya toplanışında ilk qələbəsi oldu.

Oyunu maraqlı edən daha bir məqam var idi. Belə ki, “Boreç”in heyətində azərbaycanlı futbolçu çıxış edirdi. Söhbət 21 yaşlı müdafiəçi Nazim Məmmədzadədən gedir. "Neftçi-2"nin üzvü Şimali Makedoniya təmsilçisində baxışdadı. Mərkəz müdafiəçisi 70 dəqiqə meydanda oldu. Demək olar ki, ən yaxşı oyun sərgiləyən məhz Nazim idi. Müdafiəçi etibarlı oyunu ilə həm komandasının məşqçisinin, həm oyunu izləyən yığmamızının köməkçi məşqçilərinin, həm də 19 yaşlılardan ibarət yığmanın çalışdırıcısı Samir Əliyevin diqqətini çəkdi. Onu da əlavə edək ki, “Boreç”in heyətində 7 futbolçu koronavirusa yoluxduğundan komandaya bu görüşdə kömək edə bilmədi.

Xatırladaq ki, Türkiyə toplanışındakı ilk matçında Polşa “Zaqlembe”sinə uduzan (1:2) “qırmızı-qaralar” yanvarın 24-də Çexiya “Bohemians”ı ilə üz-üzə gələcək.

İLKİN SULTANLI, Antalya