Türkiyədə təlim-məşq toplanışında olan “Zirə” srağagün növbəti yoxlama oyununu keçirdi.

Rəşad Sadıqovun komandası Antalyadakı ikinci sınağında Polşa “Qurnik”i (Lençna) ilə üz-üzə gəldi. Oyundan əvvəl komandalar 20 Yanvar şəhidlərinin xatirəsini 1 dəqiqəlik sükutla yad etdi. Azərbaycan təmsilçisi şəhidlərin xatirəsinə hörmət əlaməti kimi meydana qara sarğı ilə çıxdı.

“Zirə” bu oyunda aşağıdakı heyətlə mübarizə apardı: 41. Anar Nəzirov (1. Mehdi Cənnətov), 10. Ağabala Ramazanov (k), 91. Coşqun Diniyev (13. Ramin Əhmədov), 4. Cəlal Hüseynov (15. Ruslan Abışov), 19. Təmkin Xəlilzadə, 32. Qismət Alıyev, 44. Dimitrios Çantakias, 9. David Volkov (47. Məhəmməd Hamdaui), 21. Hacıağa Hacılı (56. Samir Ağayev), 8. İlkin Muradov (61. Nizami Səmədov), 9. Loris Broqno (64. Mahmud Ağayev).

Oyunu əsas yığmanın məşqçiləri, Məşqçilər Komitəsinin üzvləri, Azərbaycanda fəaliyyət göstərən menecerlər, əncəbi agentlər də izləyirdi. “Zirə” görüşə fəal başladı. Lakin “qartallar”ın müdafiəsində yer alan futbolçular ilk hissədə səhvlərə yol verirdi. Əsasən də Təmkin top itirdikdən sonra kobudluğa əl atırdı. Bu da “Zirə”yə baha başa gəldi. 21-ci dəqiqədə Təmkin cərimə meydançasında rəqibə qarşı kobud oynayaraq penaltiyə səbəbkar oldu. Topun arxasına keçən Bartoş Spiazçka Nəzirovu məyus etdi. Fasiləyə kimi “Zirə” qol vura bilməsə də, polşalılardan daha üstün oynayırdı.

İkinci hissə başlayan kimi “qartallar” yenə hücuma atıldı. Bu da bəhrə verdi. 49-cu dəqiqədə Lorisin zərbəsindən sonra top rəqib futbolçunun əlinə dəydi. Hakim bu epizodda penalti təyin etdi. Təmkin isə zərbəni dəqiq yerinə yetirərək hesabı bərabərləşdirdi. Lakin zirəlilərin sevinci heç 2 dəqiqə çəkmədi. Miçal Mak polşalıları hesabda önə keçirdi. Bu, epizodda “Zirə”nin müdafiəçilərinin və Anarın ciddi mövqe səhvi var idi. Buna baxmayaraq, Rəşad Sadıqovun komandası həvəsdən düşmədi. Ardıcıl hücumlar təşkil edən komanda 60-cı dəqiqədə İlkin Muradovun qolu ilə hesabı bərabərləşdirdi. Diqqəti çəkən məqamlardan biri Rəşad Sadıqovun oyun ərzində 4 gənc futbolçunu meydana buraxması oldu. Görünür, mütəxəssis yeni transfer olmayacağı təqdirdə, onlardan ehtiyat qüvvə kimi yararlanmağı düşünür.

Beləliklə, qarşılaşmada 2:2 hesabı ilə bitdi. “Qartallar” Antalyadakı ikinci matçında da qələbə qazana bilmədi. Onlar ilk yoxlama oyununda Macarıstan “Peç”inə 3:5 hesabıyla məğlub olmuşdu.

İLKİN SULTANLI, Antalya