“Xan Lənkəran” problemli məşqçiləri istefaya göndərdi - AÇIQLAMA
Bir müddət əvvəl "Xan Lənkəran" bəyanat yayaraq məşqçi İqbal Babayev və köməkçisi Cəfər Mirzəyevin istefaya göndərildiyini açıqlamışdı.
İstefaya göndəriləndən dərhal sonra redaksiyamıza futbolçular və məşqçi arasında problem yaşandığı haqda məlumat daxil olmuşdu. Klub isə məsələ ilə bağlı sonra məlumat verəcəyini bildirmişdi.
Cənub təmsilçisi düşərgədə nələrin baş verdiyini elan etmədən yeni baş məşqçi də təyin etdi. Bu, "Adana Dəmirspor"un əfsanələrindən sayılan, PRO kateqoriyalı, TFF liqasında çalışmış İbrahim Uzuncadı. Məşqçilik fəaliyyətinə 1995-ci ildə başlayan mütəxəssis "Adana Dəmirspor", "Ərciyəspor", "Osmaniyəspor" və “Bakı”nın "sükanı arxasında" olub. Yeni mütəxəssislə razılaşan klub yenidən bəyanat yayaraq bundan öncəki istefanın səbəbini açıqlayıb:
"Xan Lənkəran"nın məşqçiləri İqbal Babayev və Cəfər Mirzəyev son qarşılaşmadakı məğlubiyyət səbəbindən istefaya göndərilməyib. Adı çəkilən məşqçilər bir neçə dəfə komandadaxili qaydaları pozduqlarına, futbolçularla və idarə heyətimizdəki əməkdaşlarla problem yaşadıqlarına görə klubun prezidenti tərəfindən istefaya göndəriliblər. Bu qərar "Neftçi-2" ilə oyundan sonra qəbul edilsə də, "Turan Tovuz"la görüş gününə təsadüf edib. Klubumuz dəyərlər üzərində qurulub və bundan sonra da həmin dəyərlərə hansısa mənfi təsir göstərən şəxslər dərhal klubdan uzaqlaşdırılacaq”.
Klubda baş verən hadisələrə aydınlıq gətirmək üçün mətbuat katibi Famil Məmmədova müraciət etdik:
"Məşqçilər bir neçə dəfə klubdaxili qaydaları pozub. Həm futbolçular, həm də idarə heyəti ilə problemlər yaşayıb. Elə buna görə də onlarla yolları ayırmaq qərarına gəldik. Onlara komandada qalmaq üçün "Neftçi-2" ilə oyundan sonra şans verildi. Amma bu şans özünü doğrultmadı. Bəzi məsələlər klubdaxili olduğuna görə geniş açıqlama verə bilmirik. Yeni təyin olunan baş məşqçiyə gəlincə, İbrahim Uzunca təcrübəli mütəxəssisdi. Həm də Azərbaycan azarkeşlərinə yad biri deyil. Burda çalışıb. Düşünürük ki, komanda üçün ən uyğun namizəd məhz odu. Rəhbərliyin istəyi ilə komandaya gətirilib. Ondan başqa konkret danışıq apardığımız çalışdırıcı olmayıb. Elə istəyimiz o idi".
GÜNAY VƏLİYEVA
