Nurlan İbrahimovla bağlı qərar yanvarın 27-də veriləcək - AÇIQLAMA
UEFA-nın İkinci Qarabağ Müharibəsi zamanı ermənilərin Bərdəyə atdıqları raketlər nəticəsində çoxlu dinc vətəndaşımızın, xüsusən də uşaqların həlak olmasına “feysbuk” səhifəsində emosional reaksiya verdiyinə görə Nurlan İbrahimovu futboldan ömürlük uzaqlaşdırdığından xəbərdarsız.
Onu da qeyd edək ki, həmin paylaşıma görə "Qarabağ" da 100 min avro cərimələnib. Qərardan narazı qalan İbrahimov və onun hüquqlarını müdafiə edən Fərid Haqverdiyevin İdman Arbitraj Məhkəməsinə (CAS) qitə futbol qurumundan apellyasiya şikayəti verdiyini də əvvəlki saylarımızda qeyd etmişdik. CAS 2021-ci il dekabrın 22-də son qərarını açıqlamalı olsa da, prosesi yubadaraq 2022-ci il yanvarın 27-ni nişan vermişdi.
Deyilən tarixdə CAS hansı qərarı qəbul edə bilər? Bu suala aydınlıq gətirmək üçün İbrahimovun vəkili Fərid Haqverdiyevlə əlaqə saxladıq:
“Bildiyiniz kimi, CAS-da iclas oktyabrın 8-də baş tutmuşdu. Ondan sonra noyabrın 25-nə kimi qərar verilməli idi. Sonradan həmin müddət dekabrın 22-nə kimi uzadıldı. Həmin vaxtda da qərar verimədi və tarix yanvarın 27-nə kimi uzadıldı. Yəni artıq iclaslar keçirilmir. Sadəcə, bizə İdman Arbitraj Məhkəməsindən məktub ünvanlanır ki, qərarın açıqlanması tarixi uzadılıb. Aldığımız son məktubda son tarix kimi yanvarın 27-si göstərilib. Qərar göstərilən tarixdən bir-iki gün tez də açıqlana bilər. Hələ ki gözləmə mövqeyindəyik. Bizə əvvəlcədən məlumat verilmir. Yanvarın 27-dək gözləməliyik. Qərar ertələnsə, yanvarın 26-da da bizə məlumat verilə bilər. Ancaq təxirə salınsa, növbəti dəfə qarşı tərəf bizə məktub göndərəcək”.
RƏŞAD, "Futbol+" qəzeti üçün
