“İlk növbədə yığmamızı Avropa çempionatının final mərhələsinə qatıldığı üçün təbrik etmək istəyirəm. 2000-ci illərin əvvələrində bəlkə də bu real görünmürdüsə, 2010-ci ildən artıq Azərbaycan müntəzəm qitə çempionatına qatılan yığmalar arasındadı. Bizimlə eyni qrupda olanlar arasında İspaniyanın favorit olduğu heç kimə sirr deyil. Bosniya və Hersoqovina və Gürcüstanla əvvəlki illərdə də qarşılaşmışıq. Özümü futzalda görəndən gürcüləri, demək olar ki, həmişə məğlub etmişik. Ancaq indi vəziyyət dəyişib. Bildiyim qədər onlar da 8 braziliyalı futzalçını “milliləşdirib”. Onlardan ikisi zədə səbəbindən turnirdə iştirak etməyəcək. Buna baxmayaraq, qonşularımızın çox güclü futzalçıları var. Həqiqətən də birinci oyunun nəticəsindən çox şey asılıdı. Gürcülərlə matçdan qalib ayrıla bilsək, böyük ölçüdə qrupdan çıxmağı bacaracağıq. Federasiyanın prezidenti Zaur Axundov iddialı funksionerdi. O həmişə millinin qarşısına yüksək hədəflər qoyur. Bu turnirdə ilkin hədəf qrupdan çıxmaqdı. Bizim yığmanın üstün cəhəti? Alesio 2009-cu ildən komandanı çalışdırır. Geridə qalan illərdə hardasa müəyyən səhvlərə yol vermişdisə, indi daha təcrübəlidi. O futzalçıların fərdi ustalığına yox, taktiki oyuna üstünlük verir. Yəqin ki, baş məşqçi geridə qalan müddətdə həm Gürcüstanın, həm də Bosniya və Hersoqovinanın oyunlarını izləyib, qeydlər götürüb. Fikrimcə, yığmanın üstünlüyü taktiki cəhətdən istər gürcülərdən, istərsə də bosniyalılardan daha hazırlıqlı olmasıdı. Mən baş məşqçini yaxşı tanıyıram. Böyük ehtimalla Niderlandda da 5-ci oyunçudan istifadə edəcək. Yəni qapıçını meydan oyunçusu ilə əvəz edəcək. Bəlkə də qrupdakı komandalar arasında bu üstünlükdən bizim kimi yararlanmağı bacaran ikinci kollektiv yoxdu. Artıq neçə illərdi bu gedişi tətbiq edir və özünü doğruldur. Futzalçılarımız da həmin an necə oynamalı olduqlarını yaxşı bilirlər. Futzalda qolların 70 faizi standart vəziyyətlərdən vurulur. Bundan yararlanmaq lazımdı, vaxtında yerdəyişmələrlə rəqibi çaşdırmaq mümkündü”.

“Qrup ikincisi kimi növbəti mərhələyə adlamaq uğrunda mübarizə Bosniya və Hersoqovina, Gürcüstan və yığmamız arasında gedəcək. Bizim bu iki komandadan üstün cəhətimiz odu ki, futzalçılarımız artıq xeyli müddətdi bir yerdə oynayırlar. Düzdü, indi fərqli klubların şərəflərini qorusalar da, 6 idlən çoxdu yığmada bir yerdədilər. Gürcüstanın heyəti isə cəmi iki ildi yığılıb. Heyətə yeni braziliyalılar dəvət etsələr də, komanda şəklində hələ “bişməyiblər”. Çəkindiyim odu ki, turnir ərəfəsində az yoxlama görüşü keçirdik. Fikrimcə, oyun sayı çox olmalıydı. Baş məşqçi onu düz vurğuladı ki, komanda 8 aydan sonra bir araya gəldiyinə görə ukraynalılar qarşısında zəif təsir bağışladı. Futzalın öz qanunları var ki, böyük futboldan fərqlidi. Burda çox şey anlaşmadan və parketdə yerdəyişmələrdən asılıdı. Böyük futbolda bəzən hansısa səhvi “sığortalamaq” üçün vaxt olur, futzalda isə hər şeyi saniyələr həll edir. Ancaq ümid edək ki, son toplanışda çatışmazlıqlar yoluna qoyulub və milli Gürcüstanla matçda qələbə qazanıb, qrupdan çıxmaq tapşırığını böyük ölçüdə həll etmiş olacaq”.