Həmkarları Kamran Ağayevi müstəqillik dönəminin ən yaxşı qapıçısı saymır - AÇIQLAMA

19 yan, 22 - 14:30586

Azərbaycan futbol ağacından ötən həftə bir yarpaq da düşdü.

Söhbət millimizin sabiq qolkiperi Kamran Ağayevdən gedir. O, keçdiyimiz günlərdə “Şəfa”da başlayan karyerasını Xəzərin sahilində - “Səbail”də bitirdi. 35 yaşlı Ağayev heç kimin gözləmədiyi bir vaxtda, müqavilə müddəti başa çatmadan “dənizçilər”in rəhbərliyinə karyerasını bitirməyi qərara aldığını bildirdi. Bu vidadan saatlar sonra AFFA-nın icraçı vitse-prezidenti Elxan Məmmədov onunla görüşüdü. Müvafiq kurslara qatılandan sonra millilərin qapıçı məşqçisi vəzifəsinə gətirələcəyini söylədi.

Futbol ictimaiyyətinin və azarkeşlərin böyük qisminin fikrincə, Kamran Ağayev müstəqillik dönəmində yetişən ən yaxşı qapıçıdı. Görəsən, bununla bağlı birvaxtlar milli komandanın şərəfini qoruyan, həm də Kamranın sabiq həmkarları nə fikirləşir? Bu suala cavab tapmaq üçün üçünə müraciət etdik.
Rauf Mehdiyev:

“İlk öncə qeyd edim ki, müstəqillik dövrü 30 ildən artıq bir müddəti əhatə edir. 1990-cı illərdə Kamran hələ uşaq idi. Həmin zamanda isə ondan da yaxşı qapıçılar olub. Məsələn, Elxan Həsənov, Rauf Salamov kimi qolkiperlər var idi. Hansı ki, parlaq oyunları ilə seçilirdilər. Kamran, səhv etmirəmsə 2008 və ya 2009-da parlamağa başladı. Amma düşünürəm ki, həmin dövrdə də tək Ağayevdən söhbət gedə bilməz. Çünki onunla yanaşı, başqaları da yaxşı səviyyədə idi. Ancaq milli nöqteyi-nəzərindən götürsək, bəli, deyə bilərəm ki, Kamran Ağayev çox yaxşı çıxış edib. 2008-10-cu illər aralığında həqiqətən də yüksək səviyyədə oyun nümayiş etdirib”.

Fərhad Vəliyev:

“Müstəqillik dönəmində, demək olar ki, bir çox güclü qapıçımız olub. Onlardan biri kimi Kamran Ağayevi də qeyd etmək olar. Müstəqillik dövründən bu yana Dimitri Kramarenko, Elxan Həsənov, Cahangir Həsənzadə, elə Kamranın özü ən yaxşı qapıçılardı. Amma “ən güclü odu” deyə bilmərəm. Sadəcə, ilk “4-lüy”ə Kamranı da salmaq olar”.

Hüseyn Məhəmmədov:

“Bu mənim şəxsi fikrimdi ki, müstəqillik dövründən bəri millimizin qapıçılarından ən uzunmüddətli oynayanlardan biri də Kamran Ağayevdi. Çıxış etdiyi dövrdə də sabit performans sərgiləyib. Uzun müddət millimizin şərəfini qoruyub. O, bir qapıçı kimi həmişə əlindən gələnin ən yaxşısını ortaya qoyub. Müstəqillik qazanılandan bəri millidə bir çox qapıçı çıxış edib. Onlardan Aleksandr Jidkov, Dmitri Kramarenko, Elxan Həsənov, Nizami Sadıqov və öz adımı çəkə bilərəm. Ümumiyyətlə, Kamran say etibari ilə daha çox oyunda millinin qapısını qoruyub. Olduğu dönəmdə də lazımi səviyyədə yığmada çıxış edib. Ən yaxşılardan biri kimi də əlindən gələni edib. Mən bunları bir həmkarı olaraq deyirəm. Bacarığını lazımi şəkildə ortaya qoyan qapıçıladandı. Bu fikirlə də razılaşıram. Ona görə ki, Kamran həqiqətən də milli üçün öz dövrünün ən yaxşı qapıçısıdı”.

SƏNƏM FƏRHADOVA