Kim nə deyir-desin, Mahir Emreli son ayyarımda Azərbaycan idman mediasının 1 nömrəli ulduzudu.
Məndən olsaydı, heç düşünmədən bu futbolçunun soyadını “Mədətov” yazardım. Amma haqq var, hüquq var, adam sənəd üzərində soyadını dəyişibsə, biz də elə belə deməyə borcluyuq. Necə deyərlər, qanun qarşısında boynumuz qıldan incədi...
Dəfələrlə demişəm, bir daha deyirəm: fikrimcə, Mahirin Polşadan ayrılması səhv qərardı. Mən onun yerində olsaydım, “Legiya”da da qalmaz, bir başqa kluba keçib, özümü Polşanın tələbkar publikasına sübut edərdim. Polşadan ayrılmaq qərarı kimi, nəzərdə tutulan vaxtda, yəni yanvarın 5-də “Legiya”nın düşərgəsinə dönməmək də səhvdi. Məntiqlə dönməli, dəlillərini bir daha klub rəhbərliyinə çatdırmalı, çox sakit şəkildə “daha “Legiya” forması geyə bilmərəm” deyib, transferə çıxarılması və ya icarəyə verilməsi yönündə danışıqlara başlamalıydı. Bunların heç birini etmədiyinə görə bu gün “Legiya”nın idman direktoru Yatsek Zelinski “dəlillərimiz yetərincə güclüdü” deyə bilir. Mahiri gözüm götürməsəydi, onun istər avtobus olayının təfərrüatı, istərsə “Legiya”dakı gələcək taleyi ilə bağlı ayrı-ayrı qaynaqlara verdiyi ziddiyyətli açıqlamaları da xatırladardım. Sadəcə, buna ehtiyac duymuram. Axı başqa mətləblər də var.
Sosial şəbəkələrdə gedən müzakirələrdən belə hiss olunur ki, adamlar Emreli haqda söz-söhbətdən, yazılardan və xəbərlərdən bezib. Ən azı ona görə ki, hər yeni xəbər adamı düşünməyə məcbur edir, həqiqət axtarışında ora-bura vurnuxursan. Burda altını cızmaq istədiyim iki önəmli məqam var. Birincisi, Qərb, eləcə də qardaş Türkiyənin mediasında olayı dəfələrlə, günlərlə, hətta bəzən aylarla saf-sürük etmək, ən xırda detallarına qədər araşdırmaq vərdişi var ki, indi-indi ölkəmizə ayaq açır. Gizlətməyə dəyməz, biz “Futbol+” olaraq, eləcə də başqa həmkarlarımız informasiya axınında, versiyaları düzüb-qoşmaqda önə çıxmağa, bəzən təhqiqatçı vərdişlərinə yiyələnməyə çalışırıq. Əlbəttə, bu tendensiya oxucuya, sadə sosial şəbəkə istifadəçisinə bezdirici, yorucu görünə bilər. Ancaq elə burdaca 1-ci ilə birbaşa bağlı olan 2-ci məqam önə çıxır.
Ölkəmizdə populyar, təkcə oyunu yox, ailə dramı ilə də gündəmdə olan, valideynləri boşandığına görə soyadını dəyişən, bu yaşda Mərkəzi Avropada oynamaq imkanı qazanan, legioner karyerasına fırtına kimi başlayan oyunçuların sayı o qədər də çox deyil. Daha doğrusu, heç yoxdu. Populyarlığı, fərdə ictimai marağı oyadan münbit zəmin varmı? Var! Mahirlə bağlı ən müxtəlif həcmdə və janrda olan yazılar oxucu bazarında ildırım sürəti ilə yayılırmı? Yayılır! Mahir ünsiyyətcil, xarizmatik, sosiallaşmış, ekranlardan düşməyən, futbol və şou-biznes aləminin qarışıq dünyasında özünə nəhəng yer etmiş simadımı? Simadı! Deməli, onun indiki populyarlığını da, aylardı gündəmdən düşməməsini də təbii qarşılamaq, taleyinin aydınlaşacağı günü gözləmək lazımdı.
Hə, daha bir ağrılı nöqtənin üzərinə gəldik. Bütün bu qarma-qarışıqlıq fonunda Mahirin futbolçu obrazı zərər görürmü? “9-luğ”a möhtəşəm və dəqiq zərbə! Görür, özü də necə! Hər nə qədər fərdi şəkildə və Allah bilir, hansı idman salonunda çalışsa da, Azərbaycan futbolu, özəlliklə də yığması onu tədricən itirməkdədi. Mahir Avropaya həm də pul qazanmağa yollanmışdısa, futbolumuz da ona yeni “ağ atlı oğlan” gözü ilə baxırdı. Ki, gəlsin və yığmanın çoxdan bağlanan bəxtini açsın, qolları sıralasın, çoxdan yığmadan bezən azarkeşlərin könlünə su səpsin. Baxın, dostlar, mənim üçün əsas qıcıq doğuran məqam da budu. Bu gün yaşıl meydanda futbol mövsümünün ikinci yarısına hazırlaşmalı olan istedadlı birisi elə həmin istedadın parıltısı altında kölgələnir, papağını günə yandırır, taleyinin necə olacağını bilmir, az qala hər həftə bir-birini tamamlamayan açıqlamalar verir.
Mənə elə gəlir ki, Mahirin ətrafında ona doğru yol göstərənlər yoxdu və ya belələrinin sayı çox azdı. Hələ də gec deyil, Mahiri Azərbaycan futboluna qazandırmaq yolunda nələrsə etmək olar. Baxmayaraq ki, futbolçunun vəkillərinin, anasının mövqeyi ilə “Legiya” düşərgəsindən gələn açıqlamalar bir-biri ilə səsləşmir, münasibətlər anlaşma cığırından dava-dalaşa, hüquqi müstəviyə meyillənməkdədi. Kim bu yolda nəyi bacarırsa, çıxsın ortaya, Mahiri taleyin ümidinə buraxmayaq. İtirən təkcə o deyil, həm də Azərbaycan futboludu!
HÜŞƏNG
