“Mersedes” FIA ilə sövdələşməyə gedib?
BBC-nin iddiasına inansaq, “Formula-1” üzrə dünya çempionatının 7 qalibi Lüis Hemilton hələ ki 2022 mövsümünə qatılıb-qatılmayacağına qərar verməyib.
Britaniyalı pilot və “Mersedes” Əbu-Dabi mərhələsinin sonunda yaşanan qalmaqalla bağlı Beynəlxalq Avtoidman Federasiyasının (FIA) hansı qərarı verəcəyini gözləyir. “Mersedes” həmin mərhələdən sonra yürüşün direktoru Maykl Masinin hərəkəti ilə bağlı etiraz ərizəsi yazsa da, stüardlar bunu rədd etdi, ardından komanda apellyasiya ərizəsi yazmaq istəsə də, niyyətindən daşındı. Avtoidman dünyasında gəzən söz-söhbətə görə, Almaniya komandası FIA ilə sövdələşməyə gedib: yəni “Mersedes” iddiasından çəkilir, bu qurum isə Masini işdən qovur.
Bu arada FIA Əbu-Dabi mərhələsində yaşanan hadisənin rəsmi şəkildə araşdırılmasının başladığı haqda bəyanat yayıb:
“FIA prezidenti bu, eləcə də bir çox başqa məsələni müzakirə etmək üçün bütün komandalar ilə məsləhətləşmə aparacaq. Təhlilin nəticələri fevralda “Formula-1” komissiyasına təqdim olunacaq, yekun qərar isə FIA Ümumdünya Şurasının martın 18-də Bəhreyndə keçiriləcək iclasında açıqlanacaq”.
Bir daha xatırladaq ki, dekabrın 12-də Əbu-Dabidə keçirilən mövsümün son mərhələsi ərəfəsində “Mersedes”in pilotu Lüis Hemiltonla “Red Bull”un pilotu Maks Ferstappenin eyni xalı var idi. Amma Əbu-Dabi yarışının son mərhələsində Hemiltonu qabaqlayan Ferstappen karyerasında ilk dəfə dünya çempionu oldu.
