Yanvarın 5-dən 6-na keçən gecə Avstraliya ərazisinə daxil olarkən saxlanılan dünya tennisinin 1 nömrəsi Novak Cokoviçin taleyinə bazar günü səhər saatlarında aydınlıq gəldi.
Xəbər verdiyimiz kimi, Avstraliya hökuməti onun giriş vizasını ləğv etmiş, Melburn məhkəməsinə müraciət edən serb bu qərarın ləğvinə nail olmuş, ardından vətəndaşlıq və mühacirət məsələləri üzrə nazir Aleks Houk yenidən tennisçinin vizasını qüvvədən salmışdı. Belədə Novakın vəkilləri Avstralia Federal Məhkəməsinə üz tutmuşdu. Xatırladaq ki, Houkun qərarını “ictimaiyyətin maraqlarına uyğun sayan” baş nazir Skott Morrison da dəstəkləmişdi. Houk isə bir qədər də irəli gedərək Cokoviçin ölkədə qalmasının iğtişaşlara səbəb ila biləcəyini demişdi:
“Məni yetərincə ciddi şəkildə inandırdılar ki, Cokoviç ictimaiyyət önündə peyvənd olunmaq istəmədiyini deyən peyvənd olunmayan şəxsiyyətdi. Güman edirəm ki, onun bundan sonra Avstraliya ərazisində qalması vətəndaşlarımız arasında peyvənd əleyhinə əhval-ruhiyyənin güclənməsinə səbəb olacaq ki, bu da ictimaiyyətdə potensial gərinlik, mitinqllər və etirazlar deməkdi”.
Bazar günü baş tutan məhkəmə ərəfəsində Cokoviç polis konvoyunun müşayiəti altında Melburnda yerləşən, mühacirlər üçün nəzərdə tutlan “Carlton” otelinə qaytarıldı. Onunla yanaşı, oteldə daha 33 mühacir var idi. Avstraliya Federal Məhkəməsi işə üç nəfərlik hakim heyəti (Ceyms Ollsop, Entoni Bezanko, Devid O'Kallahan) ilə baxdı. Məhkəmə Cokoviçin vəkillərinin və Avstraliya hökumətinin təmsilçilərinin dəlillərini dinlədiklən sonra Houkun vizanın təkrar ləğvi ilə bağlı qərarını dəstəklədi. Yəni tennisçinin apellyasısı rədd olundu. Bu isə artıq birmənalı şəkildə Cokoviçin ölkəni tərk etməyə məcbur olması deməkdi. Dünən start götürən “Australian Open”in püşkünün atıldığını, serb tennisçinin ilk mərhələdə həmvətəni Miomir Ketsmanoviçlə qarşılaşacağını da xəbər vermişdi. Novakı turnirdə ATP reytinqinin 150-ci pilləsində qərarlaşan italiyalı Salvatore Karuzo əvəz edəcək.
Təbii ki, Federal Məhkəmənin yekun qərarı reaksiyasız qalmadı. Əvvəlcə Cokoviçin bəyanatına diqqət yetirək:
“İndi fasilə götürəcəm, dincəlmək və bərpa olunmaq istəyirəm, sonradan izahat verəcəm. “Australian Open”də iştirak edə bilmədiyimə görə hədsiz məyusam. Ancaq məhkəmənin qərarına hörmət edirəm və Avstraliyadan getməklə bağlı bu ölkənin hakimiyyət orqanları ilə əməkdaşlıq edəcəm. Son həftələrdə bütün diqqətin mənə yönəlməsu bir qədər rahatsızlıq yaradır. Ümid edirəm ki, indi tennisə köklənə bilərik. Tennisçilərə uğurla çıxış etməyi arzulayıram. Həmçinin ailəmə, dostlarıma, komandama, azarkeşlərə və həmvətənlərimə daimi dəstəyə görə təşəkkür etmək istəyirəm. Siz mənə çox güc verdiz”.
Serbiya prezidenti Aleksandr Vukiç də Avstraliya hökumətinin qərarını şərh edib:
“Cokoviçlə danışmışam və demişəm ki, onu görməkdən ötür səbirsizlənirik, hamı onu görməyə şad olacaq. Dünyanın ən güclü tennisçisi üzərində 11 gün istehza etmək və 11-ci gündə ilk gündəki kimi qərar vermək... Bu mənasız məhkəmədə prokurorların nə qədər yalan danışdığını gördüz. Sırtıqcasına yalanlar idi. Məhkəmədə deyildi ki, Serbiyada peyvənd olunanların sayı 50 faizdən azdı, ancaq bizdə rəsmi rəqəm 58 faizdi”.
Avstraliyanın baş naziri Skott Morrison məhkəmənin son qərarını belə dəstəklədi:
“Avstraliya Federal Məhkəməsi tam heyətlə yekdilliklə Novak Cokoviçin apellyasiyasını rədd etməyə qərar verdi. Bu qərar ictimai maraqlara cavab verir. Sərhədlərin mühafizəsi və avstraliyalıların təhlükəsizliyinin qorunması ilə bağlı qərarı dəstəkləyirəm. Cümə günü dediyim kimi, avstraliyalılar bu pandemiya dönəmində çoxlu qurban verib və onlar haqlı olaraq, bu qurbanların boşuna olmamasını gözləyirlər. Pandemiya dönəmində ən aşağı ölüm və ən yüksək peyvənd göstəricilərindən birinə nail olduq, həmçinin iqtisadiyyatı qoruduq. Bu məsələlərə diqqət yetirdiyinə görə hakimə, səbirli davrandığına görə prosesin bütün iştirakçılarına təşəkkür edirəm. Avstraliya Açıq Çempionatını davam etdirməyin və tennisdən ləzzət almağın vaxtı gəldi”.
Beləliklə, Cokoviç bazar günü, Bakı vaxtı ilə 15.30-da “Fly Emirates” şirkətinin təyyarəsi ilə Melburndan Dubaya yollandı. Serbiyanın “Kurir” nəşrinin xəbərinə görə, təyyarə havaya 22 dəqiqə gecikmə ilə qalxıb. Əslində bu texniki detal artıq heç bir əhəmiyyət daşımır. Onsuz da Cokoviçin tələsəsi bir yeri yoxdu...
