“Şaxtyor”da daha bir “sambaçı”
Uzun illərdi braziliyalı futbolçuların xidmətindən daha çox yararlanan “Şaxtyor” yenə “sambaçı” transfer edib.
“Ayaks”ın oyunçusu David Neres karyerasını Ukraynada davam etdirəcək. Hər iki klubun rəsmi saytı 24 yaşlı hücumçunun keçidinin “Ayaks”a 12 milyon avro qazandırdığını xəbər verib. Neres yeni komandasında uğurlu çıxış edərsə, Niderland klubunun ona görə qazancı 16 milyon avroyadək arta bilər.
“Şaxtyor”la 4,5 illik müqavilə bağlayan David “Ayaks”da 2017-ci ildən oynayırdı. O, bu mövsüm bütün turnirlərdə iştirak etdiyi 22 oyunda 4 qolun və 2 məhsuldar ötürmənin müəllifi olub.
