2021-ci ildə “Azərlotereya”nı təhvil alan Türkiyənin “Dəmirörən Holdinq” şirkəti investisiyalarını artırmaq qərarına gəlib.

Belə ki, dünəndən etibarən 4 fərqli lotereya (şans və mərc oyunları) təklif olunur. Yanvarın 15-də Bakıda yeni lotereyaların təqdimat mərasimi keçirilib. Təklif olunan yeni məhsullardan biri də “Misli”di. Bu mərc oyunu Türkiyədə çox məşhurdu. “Misli” futboldan at yarışlarına qədər bəxt sınamaq imkanı təqdim edir.

Mərasimdə “Dəmirörən Holdinq”in İdarə Heyətinin sədri Yıldırım Dəmirörən, iş adamı Kıvanç Oktay, holdinqin İdarə Heyətinin üzvü Sinan Oktay, Dəmirörənin oğulları Ərdoğan ve Əmrə Cemal Dəmirörən, Azərbaycanın iqtisadiyyat naziri Mikayıl Cabbarov, gənclər və idman naziri Fərid Qayıbov və Türkiyənin ölkəmizdəki səfiri Cahit Bağcı da iştirak edib. Mərasimdə çıxış edən Yıldırım Dəmirörən şirkətinin dünyada bu yöndə fəaliyyət göstərənlər arasında ilk “üçlük”də qərarlaşdığını bildirib: "Dəmirörən” qrupu Türkiyədə dövlətin ortaqlığı ilə idarə olunan şans oyunu sektorunda 2 il kimi qısa müddətdə böyük irəliləyiş əldə edib. Bu sektorda dünyanın ən yaxşı üç təşkilatından biridi. İndi Türkiyədə qazanılan təcrübənin Azərbaycana köçürülməsi zamanıdı".

Yıldırım bəy çıxışında qeyri-qanuni mərc oyunlarının qarşısının alınmasına da toxunub, investisiya qoyuluşunun vacibliyini vurğulayıb: "Misli”nin reallaşması ilə Azərbaycan ölkə iqtisadiyyatına daha çox töhfə verəcək. Geniş oyun portfeli ilə “qara bazar”la mübarizədə mühüm rol oynayacaq". Dəmirörən nitqini başa vurandan sonra iqtisadiyyat nazirinə plaket təqdim edib. Cabbarov da çıxışında “Dəmirörən Holdinq”in fəaliyyətinin Azərbaycan iqtisadiyyatı üçün mühüm əhəmiyyət kəsb etdiyini bildirib.

Yeri gəlmişkən, yanvarın 1-dən Azərbaycandan xarici kontorlara pul qoyuluşu bloklanıb. Gamebookers.com, bet365.com, bwin.com və başqa bukmeker kontorlarının saytlarına giriş bağlanıb. Daha adını qeyd etdiyimiz saytlar vasitəsi ilə mərc oyunları oynamaq mümkün deyil. Hətta mərc oyununda udulan məbləği əldə etmək belə sual altındadı.

Bəs bu qadağa ölkəyə nə verəcək? Bəzilərinin fikrincə, bu qadağa kimlərinsə maraqlarına hesablanıb, rəqabətsizlik mühiti yaratmaqla insnların seçim imkanlarını məhdudlaşdırırlar. Bu yerdə onu da xatırladaq ki, ölkə xaricində fəaliyyət göstərən kontorlar mərc həvəskarlarına əsasən eyni depozit və pulçıxarma metodlarını təklif edir. Bura bank kartları (bütün bukmekerlər Visa və Mastercard, debet və kredit kartlarını ödəmə və uduşların geri alınması üçün asanlıqla qəbul edir. Bank kartları Azərbaycan betterləri arasında maliyyə əməliyyatlarının ən sevimli yoludu), elektron cüzdanlar, mobil operatorlar, bank köçürmələri və cryptocurrency cüzdanları (qumar sahəsində, demək olar ki, bütün cryptocurrency əməliyyatları Bitcoin iştirakı ilə həyata keçirilir. Bəzi bukmekerlərə, betterlərə, Ethereum, Litecoin, Dashcoin cryptocurrency-də pul köçürmə imkanı verir. Xüsusilə anonimlik və əməliyyatların sürəti vacib olanlar üçün bu vasitə əla seçimdi) daxildi. Ancaq hansı vasitədən istifadə olunub-olunmamasından asılı olmayaraq, xarici kontorlara pul qoyuluşu etmək Azərbaycandan xaricə maliyyə axını deməkdi. Odu ki, yeni qadağadan sonra yüzminlərlə, bəlkə də milyonlarla vəsait (“qara bazar”ın dövriyyəsini tənzimləmək, dəqiq rəqəm söyləmək qeyri-mümkündü) ölkədə qalacaq və büdcəyə yönələn vergidən idmana, xüsusilə də futbola yatırım olacaq. Bu isə istər-istəməz ölkə futbolunun inkişafına, tərəqqisinə müəyyən təkan verəcək.

RƏŞAD, "Futbol+" qəzeti üçün