Kot d’İvuar yığmasının əsas qapıçısında dopinq aşkarlandı
Kot d’İvuar yığmasının əsas qapıçısı Silven Qbouo yarışlardan müvəqqəti kənarlaşdırılıb.
Buna ondan götürülən dopinq testinin müsbət nəticələnməsi səbəb olub.
33 yaşlı Qbouonun Afrika Millətlər Kubokunda (AMK) iştirak şansından məhrum edildiyi haqda məlumat yayan FİFA onun bu cəzadan apellyasiya vermək üçün 20 gün vaxtının olduğunu da bəyan edib. Kot d’İvuar yığması AMK-da ilk oyununu dünən Ekvatorial Qvineyaya qarşı keçirib. Komandanın E qrupundakı digər rəqibləri Əlcəzair və Syerra Leonedi.
Yığmanın baş məşqçisi Patris Bomel milli futbolçunun ilkin cəzaya məruz qalması ilə bağlı belə açıqlama verib:
“Dərhal apellyasiya vermişik. Bizə ondan götürülən dopinq testinin müsbət nəticələnməsi ilə bağlı məlumat dekabrın 27-də verilmişdi. Ötən ilin əvvəlində müayinədən keçən Silvana dərman yazılmışdı. O, həmin preparatı mart ayında qəbul etmişdi. Dopinq testinin analizi zamanı onun orqanizmində məhz həmin dərmanın tərkibi aşkar edilib. Futbol federasiyamız artıq futbolçumuzun preparatı resept əsasında qəbul etdiyini göstərən materialları FİFA-ya göndərib”
.
