AGİN yerli İcra Hakimiyyətini nişan verdi - AÇIQLAMA
"Kəpəz"in ev oyunlarını keçirdiyi Gəncə şəhər stadionunun avtomobil dayanacağı üçün təyin olunan ərazisi satılıb.
Bu haqda klubun fan-qrupu "Xəmsə" "feysbuk" səhifəsində xəbər yayıb. Həmin ərazidə inşaat materialları dükanının tikiləcəyi qeyd olunub. Həmçinin onlar aidiyyatı qurumlardan cavab gözlədiklərini də bildiriblər.
Yayılan xəbəri araşdırmaq üçün stadionun Gəncə şəhəri üzrə məsul şəxsi olan Həmid Nəsirovla əlaqə saxladıq. O, bizə bu məsələ ilə bağlı Gənclər və İdman Nazirliyinin mətbuat xidmətindən məlumat almağı məsləhət gördü. Belədə sualımızı qurumun mətbuat xidmətinin rəhbəri Qabil Mehdiyevə ünvanladıq. Onu da nəzərinizə çatdıraq ki, stadion nazirliyin balansındadı: "Stadion Gəncə şəhərindədi. Ona görə də şəhər İcra Hakimiyyəti ilə dəqiqləşdirin. Çünki biz tərəfdən tikinti aparılmır. Nazirlik tərəfindən icazə də verilməyib. Sualınızı şəhər İcra Hakimiyyətinə verə bilərsiz".
Bu açıqlamadan sonra yenidən Həmid bəylə əlaqə saxlamaq istəsək də, cəhdimiz nəticəsiz qaldı. Onsuz da qəzalı vəziyyətdə olan Gəncə şəhər stadionu, deyəsən, həm də sahibsiz qalıb. Hər kəs stadionda istədiyini edir. Məsələyə
yenidən qayıdacağıq.
SƏNƏM FƏRHADOVA
