De Byazi və Obradoviç Antalyaya yollanacaq
Azərbaycan premyer-liqasında çıxış edən klubların hamısı təlim-məşq toplanışına başlayıb.
“Zirə” və “Neftçi” artıq Antalyadadı. Başqaları isə hələ ki öz bazalarında hazırlığa start veriblər. Bir sözlə, Azərbaycan futbolunda canlanma müşahidə olunur.
Görəsən, yığmamızın əcnəbi baş məşqçiləri üçün istirahət nə zaman bitəcək? Canni de Byazi, Milan Obradoviç və Miloş Velebit nə vaxt Azərbaycana təşrif buyuracaqlar? Bu sualı AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdullaya ünvanladıq: “19 yaşadək futbolçulardan ibarət yığmanın baş məşqçisi Miloş Velebit yanvarın 16-da Bakıda olacaq. U-21-in çalışdırıcısı Milan Obradoviç isə klublarımızın Antalyadakı toplanışını izlədikdən sonra paytaxtımıza təşrif buyurmağı planlaşdırır. Əsas yığmanın baş məşqçisi Canni de Byazi də eyni prosesi həyata keçirmək istəyir. Bununla bağlı qərar bu həftənin sonuna qədər dəqiqləşəcək”.
İLKİN SULTANLI
