Bildiyiniz kimi artıq ölkə çempionatı qış fasiləsinə yollanıb.
Klublarımız isə mövsümün ikinci yarısı üçün hazırlığa başlayıblar. "Neftçi", "Qarabağ", "Zirə", "Qəbələ" və "Sabah" təlim-məşq toplanışını Antalyada keçirəcəklər. Bu müddət ərzində isə onlar marqlı yoldaşlıq oyunlarına çıxacaqlar. Ötən xəbərlərimizdə bu qarşılaşmaların "CBC Sport" tərəfindən yayınlanmayacağını diqqətinizə çatdırmışdıq. Bəs, PFL-in rəsmi saytı necə? Onlar bu matçları sayt üzərindən azarkeşlərə təqdim edəcəklər?
Bunu öyrənmək üçün PFL-in mətbuat xidmətinin rəhbəri Aslan Şahgəldiyevlə əlaqə saxladıq. Qurum rəsmisi məsələyə sabah aydınlıq gələcəyini bildirdi.
"Neftçi"
Flaqman 10 - 25 yanvarda Türkiyədə olacaq və Antalyanın Manavqat qəsəbəsindəki “The Sense De Luxe” otelində məskunlaşacaq. "Ağ-qaralar" yanvarın 14-də Macarıstanın “Kişvarda”, 19-da Polşanın “Visla” (Plotsk) , 24-ü isə Bolqarıstanın "MOİK 1948" klubu ilə qarşılaşacaq.
"Qarabağ"
Ayın 12-də qonşu ölkəyə yollanacaq."Köhlən atlar" yanvarın 14-ü "Qaz Metan" (Rumıniya), yanvarın 21-i "Şlyonsk Vroçlav" (Polşa), yanvarın 25-i isə “Visla” (Polşa) klubları ilə üz-üzə gələcək. Yanvarın 21-i və 25-i daha iki oyun nəzərdə tutulub. Komanda səhər saatlarında Serbiyanın "Batska Topola" və Slovakiyanın "Tatran" klubları qarşılaşacaq. Bu iki oyunda əsasən, gənc futbolçulara şans veriləcək.
"Zirə"
Paytaxt təmsilçisi bu mövsüm də toplanışa rəqiblərindən daha tez başlayıb. Belə ki, "qartallar" yanvarın 5-i Antalya şəhərinə yola düşüb. Onlar yanvarın 13-ü Macarıstanın “Peç”, 20-si Polşanın “Qurnik”(Leçna), 24-də isə Şimali Makedoniyanın “Breqalniça” klubları ilə qarşılaşacaq.
"Qəbələ"
“Qırmızı-qaralar” yanvarın 15-dən 25-dək Antalyada hazırlıq keçəcək. Bu müddətdə komanda üç sınaq matçına çıxacaq. "Qəbələ" Yanvarın 18-i Polşa təmsilçisi “Zaqlembe” , 21-i Şimali Makedoniyanın "Boreç" , yanvarın 24-də isə Çexiya “Bohemians”ı ilə üz-üzə gələcək.
"Sabah"
Masazır təmsilçisinin Antalya toplanışı 12-26 yanvar tarixlərini əhatə edəcək. "Sabah" yanvarın 15-də Macarıstanın “Pakş”, 25-də isə Serbiyanın “Mladost” (Luçani) komandaları ilə qarşılaşacaq.
SƏNƏM FƏRHADOVA