Məlum olduğu kimi ''Fənərbaxça'' mövsümün əvvəlində yarımçıq qalan hekayəni tamamlamaq üçün baş məşqçi postuna gətirdiyi Vitor Pereyra ilə hələ ilk dövrə başa çatmadan yollarını ayırdı.

Portuqaliyalı göndərilmədən öncə başqan Əli Koç ''məşqçimizin təzminatı yoxdu'' açıqlamasını vermişdi. Rəsmi açıqlamada Pereyra ilə qarşılıqlı anlaşma şəklində müqavilənin ləğv olunduğu qeyd olunmuşdu. Amma bu məşqçinin klubdan növbəti dəfə FİFA-ya şikayət etdiyi məlum olub!

Pereyranın illik məvacibi 2 milyon avroya bərabər idi və o, yayda ikiillik müqaviləyə imza atmışdı. İstanbul nəhəngi istefaya göndərənə qədər ona artıq 1,5 milyon avro ödəmişdi. Rəhbərlik istefadan sonra ona ''daha 1,5 milyon avro ödəyək və məsələ bağlansın'' təklifini irəli sürmüşdü. Amma 53 yaşlı mütəxəssisin bu təklifi geri çevirdiyi və müqavilə ilə ona çatmalı olan 2,5 milyon avronun hamısını tələb etdiyi məlum olub. Tərəflər bu məsələdə heç cür anlaşa bilməyincə, Pereyra bu günlərdə məsələni FİFA-ya daşımaq qərarına gəlib. Onu da bildirək ki, Pereyra artıq ikinci dəfə klubdan şikayət edib. İlk dəfə bu hal 2016-nın avqustunda yaşanmışdı. O vaxt Əziz Yıldırım tərəfindən istefaya göndərilən Pereyra FİFA-ya şikayət etmiş və ''sarı-lacivərdlilər''dən 1,9 milyon avro təzminat almışdı.